ԵՐԵՎԱՆ, 27 ՄԱՅԻՍԻ, ԱՐՄԵՆՊՐԵՍ: Երևանի քաղաքապետարանում բյուջետային միջոցների խնայողաբար օգտագործումը մշտապես եղել է ուշադրության կենտրոնում: Ազգային ժողովում լրագրողների հետ զրույցում այս մասին ասաց Երևանի քաղաքապետի առաջին տեղակալ Կամո Արեյանը: «Դա բխում է համայնքի շահերից: Մենք հիմա էլ ենք գնում խնայողության: 26 ծառայողական մեքենաների կրճատման խնդիրն արդեն լուծվում է: Դրանք սարքին մեքենաներ են, որոնք սպասարկում են պաշտոնատար անձանց, փակ բաժնետիրական ընկերությունների: Այդ քայլն արդեն արված է: Մենք բավականին զուսպ ենք մեր ծախսերի մեջ: Պետք է ասեմ նաև, որ ոչ մի կրճատում չի կարող լինել ինքնանպատակ»,- «Արմենպրես»-ի հաղորդմամբ՝ նշեց Արեյանը:

Նա ընդգծեց, որ ցանկացած կառույց պետք է ունենա այնպիսի կառուցվածք և մասնագիտական աշխատակազմի այնպիսի թվաքանակ, որով հնարավոր կլինի լիարժեք իրականացնել պարտականություններն ու լիազորությունները: «Եթե ինքնանպատակ կրճատումների ես գնում, դա ուղղակի խաթարում է ծառայության որակն ու արդյունավետությունը: Դրա համար մեր կառուցվածքը համահունչ է այն լիազորություններին և պարտականություններին, որոնք ամրագրված են Երևանում տեղական ինքնակառավարման մասին օրենքին և որոնք պարտավոր է իրականացնել Երևանի քաղազքապետը՝ որպես Երևանի ինքնակառավարման մարմին: Իսկ այդ խնդիրը լուծում են ֆինանսները և համապատասխան անձնակազմը: Եթե չկա այդ գործիքը, նա չի կարող կատարել իր ֆունկցիաները, նա չի կարող կատարել իր պարտականությունները և ծառայել քաղաքին: Դրա համար մենք այսօր ունենք ստեղծած վարչություններ ու բաժիններ, որոնցից յուրաքանչյուրը սպասարկում է իր ոլորտը»,- ընդգծեց Կամո Արեյանը:

Նա վստահեցրեց նաև, որ Երևանի քաղաքապետարանում այս պահին ավելորդ հաստիքներ չկան: Նրա խոսքով՝ այն անձնակազմը, որ կա քաղաքապետարանում, շատ դեպքերում նույնիսկ չի էլ բավարարում:

Անդրադառնալով քաղաքապետարանի ներկայացուցչական ծախսերի վերաբերյալ հարցին՝ Կամո Արեյանը նշեց, որ իրենք երբեք շռայլություններ թույլ չեն տվել: «Այսուհետև էլ լինելու ենք զուսպ, բյուջեի հնարավորությունների սահմաններում աշխատելու ենք հավասարակշռված և արժանապատիվ: Դրանք անխուսափելի ծախսեր են և պետք է համահունչ լինեն բյուջետային հնարավորություններին, վնաս չտան բյուջեին: Մենք պետք է զերծ մնանք ավելորդ շռայլություններից: Սա է լինելու մեր սկզբունքը այս տարի էլ, գալիք տարիներին էլ»,- եզրափակեց Երևանի փոխքաղաքապետը: