Հայաստանցիներն ամենից շատ վստահում են ռուսական ապրանքներին. հարցում
ԵՐԵՎԱՆ, 19 ՀՈԿՏԵՄԲԵՐԻ, ԱՐՄԵՆՊՐԵՍ: Հայաստանի բնակչությունն ամենից շատ վստահում է Ռուսաստանից ներկրված ապրանքներին: Ինչպես հաղորդում է «Արմենպրես»-ը` վկայակոչելով «ՌԻԱ Նովոստի»-ն, այս մասին են վկայում Եվրասիական զարգացման բանկի Ինտեգրացիոն հետազոտությունների կենտրոնի իրականացրած հարցման արդյունքները:
Հարցմանը մասնակցել է ավելի քան 11 հազար քաղաքացի տարածաշրջանի ինը երկրներից` Հայաստանից, Բելառուսից, Վրաստանից, Ղազախստանից, Ղրղզստանից, Մոլդովայից, Ռուսաստանից, Տաջիկստանից և Ուկրաինայից:
«ԵԶԲ ինտեգրացման բարոմետր 2015» զեկույցում նշվում է, որ սպառողների նախապատվությունները որոշելու համար հարցման մասնակիցներին տրվել է հետևյալ հարցը. «Ո՞ր երկրի ապրանքներն եք նախընտրում գնել, որո՞նց եք ավելի շատ վստահում»:
Հարցմանը մասնակցած Հայաստանի քաղաքացիների 35 տոկոսը նախընտրել է ռուսական արտադրության ապրանքները, այնինչ 25 տոկոսը նախապատվությունը տվել է Գերմանիայից, իսկ 18 տոկոսը` ԱՄՆ-ից ներկրված ապրանքներին:
Հետազոտության արդյունքներով` թեև Հայաստանում ավելի շատ վստահում են ԱՊՀ երկրների ապրանքներին, սակայն 2015 թվականին այդ ցուցանիշը նվազել է: Եթե այս տարվա հարցման ժամանակ ԱՊՀ երկրների ապրանքներին նախապատվություն է տվել հարցվածների 36 տոկոսը, ապա 2014-ին` 50 տոկոսը:
Բաժանորդագրվեք մեր ալիքին Telegram-ում