Ջիվան Գասպարյանը համերգով հանդես կգա Մոսկվայի Crocus City Hall-ում
ԵՐԵՎԱՆ, 15 ՀՈԿՏԵՄԲԵՐԻ, ԱՐՄԵՆՊՐԵՍ: Դուդուկի վարպետ, լեգենդար Ջիվան Գասպարյանը համերգով հանդես կգա Մոսկվայի Crocus City Hall համերգասրահում: Ինչպես տեղեկացնում է «Արմենպրես»-ը` վկայակոչելով սրահի պաշտոնական` crocus-hall.ru կայքը, երեկոն տեղի կունենա նոյեմբերի 5-ին: Կայքն այն կոչում է Ջիվան Գասպարյանի հրաժեշտի համերգ:
Դուդուկահար Ջիվան Գասպարյանը ծնվել է 1928թ. հոկտեմբերի 12-ին Սոլագ գյուղում: Դուդուկ սկսել է նվագել վեց տարեկանից` առանց դասավանդուման: 1949թ. ընդունվել է Թ.Ալթունյանի անվան Ազգային երգ ու պարի համույթ: Բազմաթիվ մրցույթների դափնեկիր է: 1973թ. արժանացել է ՀԽՍՀ ժողովրդական արտիստի կոչմանը: Մոսկվայում անգլիացի երաժիշտներ Բրայն Էնոն և Փիթեր Գաբրիելը, լսելով հայ դուդուկահարի կատարումը, հրավիրել են նրան Լոնդոն: Գասպարյանը, շրջելով աշխարհով մեկ, մարդկանց ծանոթացրել է հայկական ժողովրդական երաժշտությանը: 1990թ. նրան շնորհվել է Երևանի Կոմիտասի անվան պետական կոնսերվատորիայի պրոֆեսորի աստիճան: Գրել է համաշխարհային ճանաչում վայելած այնպիսի ֆլիմեր երաժշտություններ, ինչպիսիք են` «Քրիստոսի վերջին չարչարանքները», «Գլադիատոր», «Ձյուն և մոխիր», «Սիրանա» և այլն: Թողարկել է ավելի քան 20 ձայնասկավառակ, ունի ավելի քան 1000 ձայնագրություններ, նվագել է 20 հազար համերգ: Հայաստանի և Կանադայի երաժշտական ակադեմիաների անդամ է:
Բաժանորդագրվեք մեր ալիքին Telegram-ում