Իրանում զանգվածային ցույցեր են անցկացվում հաջի ընթացքում ուխտավորների զոհվելու կապակցությամբ
ԵՐԵՎԱՆ, 25 ՍԵՊՏԵՄԲԵՐԻ, ԱՐՄԵՆՊՐԵՍ: Հազարավոր ցուցարարներ են դուրս եկել Իրանի մի քանի քաղաքների փողոցներ եւ սգո երթեր են անցկացնում ի հիշատակ այն ուխտավորների, որոնք զոհվել են Սաուդյան Արաբիայում հաջի ընթացքում տեղի ունեցած հրմշտոցից: Ցույցերի մասին պատմող ռեպորտաժներ են ցուցադրվում ԻՐԻՆՆ լրատվական ալիքով, տեղեկացնում Է «Արմենպրես»-ը:
Հավաքվածների կարծիքով, ողբերգության են հանգեցրել «թագավորության անվտանգության ծառայությունների սխալ գործողությունները»: «Բազմահազարանոց երթեր են անցկացվում ամբողջ երկրում, մասնավորապես, Մեշհեդ քաղաքում՝ Ռեզավի-Խորասան հյուսիս-արեւելյան նահանգի մայրաքաղաքում, ինչպես նաեւ Ղորղան քաղաքում՝ Ղոլեստան հյուսիսային նահանգի մայրաքաղաքում»,- նշում Է հեռուստաալիքը:
Ինչպես հաղորդել Է «Մեհր» գործակալությունը, միաժամանակ Թեհրանում բողոքի զանգվածային ակցիա Է պատրաստվում Թեհրանում Սաուդյան Արաբիայի դեսպանատան մոտ: Մայրաքաղաքի երիտասարդությունը եւ համալսարանների ուսանողները կոչ են անում բոլոր ցանկացողներին՝ կիրակի օրը՝ սեպտեմբերի 27-ի ցերեկը, միանալ ցուցարարներին:
Ընդհանուր առմամբ սեպտեմբերի 24-ին Մեքքայի մերձակայքում ուխտավորների հրմշտոցի հետեւանքով զոհվել Է 717 մարդ, տուժածների թիվը 800-ից ավելին Է: Ըստ վերջին տվյալների՝ զոհվածներից 131-ը եւ վիրավորներից 150-ը իրանցի ուխտավորներ են, հաղորդել Է ՏԱՍՍ-ը:
Բաժանորդագրվեք մեր ալիքին Telegram-ում