Գեղարքունիքում սկսվել է վայրի պտուղների բերքահավաքը
ԳԱՎԱՌ, 18 ՍԵՊՏԵՄԲԵՐԻ, ԱՐՄԵՆՊՐԵՍ: Գեղարքունիքում սեպտեմբերի առաջին շաբաթվանից սկսվել եւ ընթանում է վայրի պտուղների` տանձի, չիչխանի եւ մասուրի բերքահավաքը: Ինչպես «Արմենպրես»-ին ներկայացրեց ՀՀ վիճակագրության ազգային ծառայության Գեղարքունիքի մարզային գործակալության պետ Հակոբ Բադալյանը, վայրի տանձի բերքահավաքով հիմնականում զբաղված են Ճամբարակի տարածաշրջանի բնական անտառներին մոտիկ գտնվող գյուղերի, իսկ չիչխանի բերքահավաքով` Սեւանա լիճը գոտեւորող արհեստական անտառներին մերձակա համայնքների բնակիչները: Իսկ ահա մասուրի բերքը հավաքվում է մարզի տարածքով մեկ, ինչպես բնակավայրերին մոտիկ, այնպես էլ լեռնոտ տարածքներում:
Հավաքված բերքն օգտագործվում է ինչպես սննդի կարիքները հոգալու, այնպես էլ վաճառելու նպատակով:
«Հարյուրավոր ընտանիքներ են ներգրավված վայրի պտուղների բերքահավաքի աշխատանքներում: Ավարտին է մոտենում վայրի տանձի եւ մասուրի բերքահավաքը, իսկ ահա չիչխանի բերքահավաքը նոր-նոր է թափ առնում, որը կշարունակվի մինչեւ ձյան տեղումները:Մասուրի եւ տանձի համեմատ, առավել առատ է նաեւ չիչխանի բերքը, որի ծավալները գնահատվում են հազարավոր տոննաներով, որը վաճառվում է նաեւ մայրաքաղաքի շուկաներում: Վայրի պտուղների բերքահավաքը շատ ընտանիքների համար եկամտի լրացուցիչ աղբյուր է»,-նշեց գործակալության պետը:
Դպրաբակի գյուղապետ Հովհաննես Նազլուխանյանի հավաստմամբ` Ճամբարակի տարածքի բնական անտառներից հավաքվել է մոտ հիսուն տոննա վայրի տանձ, որի մեկ կիլոգրամը վաճառվում է ութսուն դրամով: Մասուրի մեկ կիլոգրամը վաճառվում է 400-500 , չիչխանի մեկ կիլոգրամը` 300-400 դրամով:
Խոսրով Խլղաթյան
Բաժանորդագրվեք մեր ալիքին Telegram-ում