Լաս Վեգասի օդանավակայանում 14 մարդ է տուժել ինքնաթիռում հրդեհի բռնկման հետեւանքով
ԵՐԵՎԱՆ, 9 ՍԵՊՏԵՄԲԵՐԻ, ԱՐՄԵՆՊՐԵՍ: 14 մարդ է տուժել սեպտեմբերի 8-ին Լաս Վեգաս քաղաքի (Նեւադայի նահանգ) օդանավակայանի թռիչքավայրէջքային գոտում British Airways ավիաընկերության ինքնաթիռի բռնկման հետեւանքով, տեղեկացնում է «Արմենպրես»-ը՝ հղում անելով CNN հեռուստաալիքին:
«Քաղաքի հիվանդանոցներ է տեղափոխվել 14 մարդ, որոնք վնասվածքներ են ստացել: Իշխանությունները նշում են «աննշան վերքերի» մասին, քանի որ վնասվածքների մեծ մասն ստացվել է փչովի շարժասանդուղքներով ուղեւորների արտակարգ տարհանման ժամանակ»,- նշել է հեռուստաալիքը:
Ականատեսների խոսքով՝ հրդեհն սկսվել է այն պահին, երբ ինքնաթիռը մտնում էր թռիչքային գոտի: «Առայժմ անհայտ պատճառներով բռնկել է օդանավի ձախ շարժիչը: Անձնակազմը անհրաժեշտ միջոցներ է ձեռնարկել, որպեսզի կանխվի կրակի հայտնվելն ինքնաթիռի սրահում»,- հաղորդում է CNN-ը:
Ինքնաթիռում եղել է 159 ուղեւոր եւ անձնակազմի 13 անդամ: Boeing-777 ինքնաթիռը պետք է թիվ 2276 չվերթով մեկներ Լոնդոնի Գետվիկ օդանավակայան, հաղորդել է ՏԱՍՍ-ը:
Լուսանկարը` AP
Բաժանորդագրվեք մեր ալիքին Telegram-ում