Ավետ Բարսեղյանը «Գուշակիր մեղեդին» հաղորդումը երաժշտական ժամանցի լավ տարբերակ է համարում
ԵՐԵՎԱՆ, 9 ՍԵՊՏԵՄԲԵՐԻ, ԱՐՄԵՆՊՐԵՍ: Հայաստանի հանրային հեռուստաընկերության «Գուշակիր մեղեդին» հաղորդումը լավ երաժշտական ժամանցի տարբերակ է: «Արմենպրես»-ի հետ զրույցում այս մասին նշեց նախագծի հաղորդավար Ավետ Բարսեղյանը:
««Գուշակիր մեղեդին» հաղորդումը, վստահաբար, կլցնի Հանրային հեռուստաընկերության բոլոր հեռուստադիտողների երեկոները: Այն կառանձնանա երաժշտականության եւ ինտելեկտուալի սահմանագծով, իսկ անձնապես ինձ համար՝ որպես Հանրայինում իմ վարած երաժշտական մեծ նախագիծ: Հաղորդումը հեռուստադիտողին կտա բացարձակ լավ երաժշտական ժամանցի տարբերակ, կօգնի հանգստանալուն զուգահեռ, շահագրգռված դիտել»,-նշեց նա:
Ավետ Բարսեղյանը հավելեց, որ նկարահանումներն անցել են ճիշտ գծագրված ժամային գրաֆիկով, քանի որ աշխատող ամբողջ անձնակազմը գերպրոֆեսիոնալ է:
Հայաստանի հանրային հեռուստաընկերությունն իր նոր եթերաշրջանում հեռուստադիտողների դատին հանձնեց միջազգային ամենասիրված երաժշտական նախագծերից մեկը: Առաջին ալիքի եթերում երկուշաբթիից ուրբաթ՝ ժամը 20:25-ին, կլինի «Գուշակիր մեղեդին» երաժշտական, ժամանցային նախագիծը:
Ծրագրի հյուրերը կլինեն հասարակական- քաղաքական, մշակութային եւ շոու-բիզնեսի այն ներկայացուցիչները, ովքեր մելոման են, սիրում են տարբեր ոճերի երաժշտություն: Հենց նրանք կմրցեն եւ իրենց երաժշտական գիտելիքները կփոխանցեն Հանրայինի հեռուստադիտողներին:
Նկարահանումներին մասնակցում են Հայաստանի հանրային հեռուստառադիոընկերության էստրադային եւ սիմֆոնիկ նվագախմբի անդամները, գեղարվեստական ղեկավար եւ գլխավոր դիրիժոր Երվանդ Երզնկյանը:
Բաժանորդագրվեք մեր ալիքին Telegram-ում