ԳԱՎԱՌ, 27 ՕԳՈՍՏՈՍԻ, ԱՐՄԵՆՊՐԵՍ: «Սեւան» ազգային պարկի Մարտունու մասնաճյուղում Սեւանա լիճը գոտեւորող արհեստական անտառներն այսուհետ կթարմացվեն ոչ միայն բարդու, այլ նաեւ հացենու եւ սոճու տնկիներով: Ինչպես «Արմենպրես»-ին տեղեկացրեց «Սեւան» ազգային պարկի Մարտունու մասնաճյուղի տնօրեն, անտառաբույծ Համլետ Ղիմոյանը, Երանոս գյուղի հատվածում, հացենու մոտ մեկ հեկտար պուրակում հացենու տնկիների աճել են բնական ճանապարհով, առանց միջամտության: «Հացենու պուրակի հարեւանությամբ գտնվող նորատունկ ծառերի ոռոգման արդյունքում առաջացած խոնավությունը նպաստել է, որ հողին թափված սերմերը ծիլ տան ու բարձրանան, որոնք արդեն զգալու են անտառաբույծների անմիջական խնամքի կարիքը: Նպատակադրվել ենք ցանկապատել հացենու պուրակը, որպեսզի բացառենք անասունների մուտքը: Սպասվող հսկայական քանակի տնկիները տեղ կգտնեն ոչ միայն մեր անտառի բացատներում, այլ նաեւ բնակավայրերի մայթերին, բակերում: Արդյունքը հիանալի է եւ ոգեւորող»,- նշեց անտառաբույծը:

Մարտունու տարածքի անտառների որոշակի հատվածների սոճուտներում եւս նկատվել է  սոճու սերմերի բնական աճ, կամ` սոճու հազարավոր տնկիների ստացման հնարավորություն: «Մեր անտառները լրջորեն տուժեցին Հայաստանի էներգետիկ ճգնաժամի տարիներին, իսկ այժմ կորչում են Սեւանի մակարդակի բարձրացման հետեւանքով: Մեզ մնում է ամեն ջանք գործադրել, որպեսզի կարողանանք պահպանել ու ավելացնել մեր անտառները, դրանք տարածել նաեւ լեռնային գոտիներում, որի համար մեզ բավարար քանակի տնկանյութ է հարկավոր: Բնական ճանապարհով աճած տնկիները մեզ համար ոչ միայն հայտնություն են, այլ նաեւ անտառները թարմացնելու եւ զարգացնելու բացառիկ հնարավորություն, որը պետք է պահպանել աչքի լույսի պես»,- նշեց Համլետ Ղիմոյանը:

Խոսրով Խլղաթյան