ԵՐԵՎԱՆ, 24 ՕԳՈՍՏՈՍԻ, ԱՐՄԵՆՊՐԵՍ: Վրաստանի վարչապետի՝ Ռուսաստանի հետ հարաբերությունների կարգավորման հարցերով հատուկ ներկայացուցիչ Զուրաբ Աբաշիձեն ապօրինություն է համարում Օչամչիրա-Ինգուրի երկաթգծի վերականգնման նպատակով Աբխազիայում սկսված աշխատանքները, տեղեկացնում է «Արմենպրես»-ը՝ հղում անելով «Գրուզիա Online»-ին:

Նրա խոսքով՝ Թբիլիսին Ռուսաստանի հետ բանակություններ չի վարում Աբխազիայի տարածքով երկաթուղային հաղորդակցության վերականգնման շուրջ: «Այդ թեման մենք չենք քննարկել ոչ Պրահայի ձեւաչափով, ոչ էլ այլ վայրում»,- հայտարարել է Աբաշիձեն:

Ավելի վաղ, ինչպես նշում են վրացական ԶԼՄ-ները, Աբխազիայում երկաթուղու վերականգնման վերաբերյալ հայտարարություն է արել ՌԴ պաշտպանության փոխնախարար գեներալ Դմիտրի Բուլգակովը, ով նշել է, որ հուլիսին Ռուսաստանի երկաթուղային զորքեր են ուղարկվել Աբխազիա՝ վերակագնելու երկաթուղային հաղորդակցությունը:

«Երկաթուղային զորքերի շուրջ 500 զինծառայողներ եւ ավելի քան 50 միավոր հատուկ տեխնիկա աշխատանքներ են իրականացնում Օչամչիրա կայարանից մինչեւ Ինգուրի գետ երկաթուղու վերականգնման համար»,- ճշտել է Բուլգակովը: