ԵՐԵՎԱՆ, 22 ՕԳՈՍՏՈՍԻ, ԱՐՄԵՆՊՐԵՍ: Սաուդյան Արաբիայի գլխավորած արաբական դաշինքին պատկանող ռազմական ուղղաթիռը, որը մասնակցում է Եմենում շիա ապստամբների դեմ ռազմական գործողություններին, ընկել է սաուդաեմենական սահմանի մերձակայքում: Ինչպես հաղորդում է «Արմենպրես»-ը, վկայակոչելով արաբական լրատվամիջոցները, արդյունքում երկու օդաչուները զոհվել են: Արաբական դաշինքը հետաքննություն է սկսել դեպքի առթիվ: Իրենց հերթին` շիաները հաստատում են, որ ուղղաթիռ են խոցել:

Արաբական մեկ այլ աղբյուրի տեղեկացմամբ` արաբական դաշինքի իրականացրած գործողությունների հետևանքով տասնյակ խաղաղ բնակիչներ են զոհվել ու վիրավորվել Թայիզ քաղաքում:

2015թ. հունվարից, երբ շիա ապստամբները գրավել էին մայրաքաղաք  Սանան,   ապստամբների  ճնշման տակ Նախագահ Աբդ Ռաբբո Մանսուր ալ Հադին  և վարչապետ Խալեդ Բախախը հրաժարական էին տվել: Որոշ ժամանակ անց նախագահ Մանսուր Հադին ստիպված փախուստի էր դիմել Ադեն, իսկ կարճ ժամանակ հետո՝ մարտի 25-ին շիաների Ադեն մտնելով, հեռացել էր երկրից:

Նախագահը դիմել է Սաուդյան Արաբիային` խնդրելով միջամտել ստեղծված իրավիճակին:  Մարտի 26-ին Սաուդյան Արաբիան Բահրեյնի, Քաթարի, Քուվեյթի, ԱՄԷ-ի օդային   ուժերի օգնությամբ Եմենում իրականացվել է «Վճռականության փոթորիկ» գործողությունը,  որի ավարտից հետո սկսվել է ռազմական գործողությունների մյուս՝ «Հույսի վերականգնում» փուլը: