Թբիլիսիում ջրհեղեղի հետեւանքների վերացումը կավարտվի հոկտեմբերի 15-ին
ԵՐԵՎԱՆ, 21 ՕԳՈՍՏՈՍԻ, ԱՐՄԵՆՊՐԵՍ: Թբիլիսիում ջրհեղեղի հետեւանքների վերացման աշխատանքները քաղաքապետարանը ծրագրում է ավարտվել մինչեւ հոկտեմբերի կեսը: Այդ մասին, ինչպես տեղեկացնում է «Արմենպրես»-ը, Թբիլիսիի փոխքաղաքագլուխ Դմիտրի Կումսիշվիլին հայտարարել է «Իմեդի» հեռուստաընկերությանը տված հարցազրույցում:
Լույս հունիսի 14-ի գիշերը Թբիլիսիում ավերիչ ջրհեղեղ է տեղի ունեցել. ափերից դուրս եկած Վերե գետը ջրասույզ է արել բնակելի շենքեր, կենդանաբանական այգին, շների համար նախատեսված մասնավոր ապաստարանը, վնասել է քաղաքային ենթակառուցվածքը: Ըստ վերջին պաշտոնական տվյալների՝ զոհվել է 19 մարդ, շուրջ 300 բնակիչներ անօթեւան են մնացել:
«Ամենաերկարաժամկետ նախագիծը լինելու է կենդանաբանական այգին, որի վերականգնումը կպահանջի մոտավորապես մեկուկես տարի, մնացած աշխատանքները կավարտվեն հոկտեմբերի 15-ին»,- ասել է Կումսիշվիլին:
Նա նաեւ նշել է, որ մինչեւ հոկտեմբերի 15-ը կավարտվի ջրհեղեղից տուժած բնակիչներին կացարանով ապահովումը: «Մենք արդեն փող ենք փոխանցել անտուն մնացած 54 ընտանիքներից 32-ին… զուգահեռաբար նորոգում ենք այն տները, որոնք տուժել են հեղեղումից»,- հայտարարել է Կումսիշվիլին:
Նրա խոսքով՝ հեղեղումից տուժածներին տներով եւ անհրաժեշտ ամեն ինչով ապահովելու համար բյուջեից կպահանջվի 20 մլն լարի (մոտավորապես 8,6 մլն դոլար):
Բաժանորդագրվեք մեր ալիքին Telegram-ում