ԵՐԵՎԱՆ, 29 ՀՈՒԼԻՍԻ, ԱՐՄԵՆՊՐԵՍ: Նախկինում Բուքերյան մրցանակին արժանանալու համար գրողները պարտավոր էին լինել Մեծ Բրիտանիայի քաղաքացի, սակայն անցած տարի խաղի կանոնների փոփոխությունից հետո մրցանակի հավակնորդ կարող է դառնալ Բրիտանիայում տպագրված ցանկացած անգլալեզու ստեղծագործության հեղինակ: Ինչպես հաղորդում է «Արմենպրես»-ը, վկայակոչելով «ՌԻԱ Նովոստի» գործակալությունը, այս տարի նորամուծության արդյունքում Բուքերյան մրցանակին ներկայացված «մեծ ցուցակում» բրիտանացիների թիվը կրճատվել է երկու անգամ:

Այս տարի մրցանակին ներկայացված 156 ստեղծագործություններից ժյուրին ընտրել է 13 գիրք:

Այս տարի «Man Booker Prize»-ի «մեծ ցուցակում» են հայտնվել ամերիկացի գրողներ Բիլ Քրեյգի, Լայլա Լալամիի, Մերելինն Ռոբսոնի, Էն Թայլերի և Խանիա Յանագիխարայի, բրիտանացի գրողներ Թոմ Մաքքարթիի, Էնդրյու Օ'Հագանայի, Սանջևա Սախոտի, իռլանդացի Էն Էնրայոի, Ջամայկայից՝ Մարլոն Ջեյմսի, Նիգերիայից՝ Չիգոզր Օբիոմայի, Հնդկաստանից՝ Անուրադխա Ռոյայի և Նոր Զելանդիայից Աննա Սմայլի ստեղծագործությունները:

Մրցանակին հավակնորդ լավագույն վեց ստեղծագործությունները կհայտարարվեն սեպտեմբերի 15-ին, իսկ մրցանակակրի պարգևատրման արարողությունը տեղի կունենա հոկտեմբերի 13-ին:

Բուքերյան մրցանակը հիմնվել է 1968թ.: Հաղթող գրողին հանձնվում է պարգև՝ 50 հազար ֆունտ սթերլինգի չափով: Ինչպես նաև, մրցանակի «փոքր ցուցակում»-ում ընդգրկված գրողներին հանձնվում է 2,5 հազար ֆունտ սթերլինգ և իրենց գրքի ձեռակերտ հուշանվերային օրինակը: