Կարինե Մինասյանը երիտասարդ առաջնորդների համաժողովին խոսել է ԵԱՏՄ-ի ձեռքբերումների մասին
ԵՐԵՎԱՆ, 3 ՀՈՒԼԻՍԻ, ԱՐՄԵՆՊՐԵՍ: ՌԴ Պետական Դումայում հուլիսի 2-ին Եվրասիական տնտեսական միության երիտասարդ առաջնորդների առաջին համաժողովի շրջանակում Եվրասիական տնտեսական հանձնաժողովի կոլեգիայի անդամ (նախարար) Կարինե Մինասյանը պատմել է եվրասիական ինտեգրման ծրագրերի և ձեռքբերումների մասին: Ինչպես «Արմենպրես»-ին տեղեկացրին ԵԱՏՀ մամուլի ծառայությունից, համաժողովին մասնակցել են ՌԴ Պետդումայի, ազգային և տարածաշրջանային խորհրդարանների բոլոր խմբակցությունների պատգամավորները, բիզնեսի, գիտական հասարակության ներկայացուցիչներ, Եվրասիական տնտեսական միության հասարակական և ուսանողական կազմակերպությունների ղեկավարներ:
Համաժողովի նպատակներն են՝ երիտասարդության շրջանում նպաստել եվրասիական ինտեգրման հանրահռչակմանը, ստեղծել պայմաններ մասնակիցների մասնագիտական աճի համար, որը կբերի միջպետական համագործակցության ամրապնդմանն ու ընդլայնմանը Եվրասիական տնտեսական միության տարածքում:
Կարինե Մինասյանն իր ելույթում պատմել է տարածաշրջանային տնտեսական ինտեգրման փուլերի, ԵՏՀ աշխատանքի, Միության պայմանագրի կառուցվածքի, Հանձնաժողովի ու բիզնեսի համագործակցության, նաև Եվրասիական տնտեսական միության ստեղծման մասին:
Նա նաև ընդգծել է, որ ԵԱՏՄ-ի հիմնական ձեռքբերումներից է ԵԱՏՄ անդամ պետությունների իրավահավասարության իրագործումը: «Սա հատկապես կարևոր է այն երկրների համար, որոնք ունեն փոքրածավալ տնտեսություն և քիչ թվով բնակչություն»,- ընգծել է Կարինե Մինասյանը՝ կարևորելով ԵԱՏՄ-ի թվային տարածության զարգացումը:
Բաժանորդագրվեք մեր ալիքին Telegram-ում