ԵՐԵՎԱՆ, 25 ՀՈՒՆԻՍԻ, ԱՐՄԵՆՊՐԵՍ: ԱՄՆ-ի պետքարտուղար Ջոն Քերին հունիսի 26-ին կուղեւորվի Վիեննա, որտեղ նա մտադիր է մասնակցել Թեհրանի միջուկային ծրագրի շուրջ «վեցյակի» (ՄԱԿ-ի ԱԽ-ի հինգ մշտական անդամները եւ Գերմանիան) եւ Իրանի բանակցություններին: Այդ մասին, ինչպես տեղեկացնում է «Արմենպրես»-ը, հայտնել է ԱՄՆ-ի պետդեպարտամենտի պաշտոնական ներկայացուցիչ Ջոն Քիրբին:

«Պետքարտուղար Ջոն Քերին հունիսի 26-ին կուղեւորվի Վիեննա՝ մասնակցելու միջուկային ծրագրի շուրջ Իրանի հետ «հինգ գումարած մեկ» խմբի շարունակվող բանակցություններին, որոնք համակարգվում են ԵՄ-ի կողմից»,- ասել է Քիրբին:

Ավելի վաղ դիվանագիտական աղբյուրը ՏԱՍՍ-ին հայտնել էր, որ Քերին եւ Իրանի ԱԳ նախարար Մոհամադ Ջավադ Զարիֆը կարող են Ավստրիայի մայրաքաղաք ժամանել շաբաթվա վերջին՝ հունիսի 27-28-ին:

Ներկայում բանակցություններն ընթանում են քաղաքական տնօրենների մակարդակով: Իրանի միջուկային դոսյեի շուրջ վերջնական համաձայնագիրը պլանավորվում է մշակել եւ ստորագրել մինչու հունիսի 30-ը:

Լուսանկարը`EPA