Ժամանակը Երևանում՝ 11:07:36,   19 Հունիս

Կրթության եւ գիտության նախարարն ու պատգամավորները կենդանի պատ են կազմել Բաղրամյան պողոտայում

Կրթության եւ գիտության նախարարն ու պատգամավորները կենդանի 
պատ են կազմել Բաղրամյան պողոտայում

ԵՐԵՎԱՆ, 24 ՀՈՒՆԻՍԻ, ԱՐՄԵՆՊՐԵՍ: ՀՀ կրթության եւ գիտության նախարար, ՀՀԿ փոխնախագահ Արմեն Աշոտյանը միացավ ոստիկանների եւ ցուցարարների միջեւ կենդանի պատ կազմելու կոչերին ու ժամանեց Բաղրամյան պողոտա: Այնտեղ արդեն հավաքվել են Ազգային ժողովի մի խումբ պատգամավորներ, մտավորականներ և շոու բիզնեսի ներկայացուցիչներ, ովքեր ավելի վաղ կոչ- հայտարարությամբ բռնոթյունը բացառելու նախաձեռնությամբ հանդես եկան: Ցուցարարները անհանդուրժողականություն դրսևորեցին Արմեն Աշոտյանի եւ ՀՀԿ պատգամավոր Սամվել Ֆարմանյանի նկատմամբ: Նրանց հասցեին սկսեցին վիրավորական արտահայտություններ հնչեցնել. նույնիսկ նկատվեց, որ ցուցարարներից մեկը ինչ-որ իր նետեց Արմեն Աշոտյանի ուղղությամբ:

Իր հերթին՝ ԱԺ անկախ պատգամավոր Խաչատուր Քոքոբելյանը լրագրողների հետ զրույցում նշեց, որ նախաձեռնության նպատակն ակցիայի մասնակիցների և ոստիկանության միջև հնարավոր բախումը կանխելն է: «Մենք չենք եկել այստեղ, որպեսզի միջամտենք ակցիայի մասնակիցների գործողություններին և ծրագրերին: Պարզապես ցանկանում ենք կանխել հնարավոր միջադեպը, որը տեղի ունեցավ նախօրեին»,- «Արմենպրես»-ի հաղորդմամբ` ասաց Քոքոբելյանը:

Բաղրամյան պողոտա գալու եւ կենդանի պատը կազմելու հայտարարություն-կոչն արվել է դերասաններ Հայկ Մարությանի, Հովհաննես Ազոյանի, ԱԺ պատգամավորներ Ալեքսանդր Արզումանյանի, Թեւան Պողոսյանի, Նիկոլ Փաշինյանի, Զարուհի Փոստանջյանի, Էդմոն Մարուքյանի, Լյուդմիլա Սարգսյանի, Տիգրան Ուրիխանյանի, ԱԺ նախկին պատգամավոր Սասուն Միքայելյանի, երգահան Եղիշե Պետրոսյանի, հեղինակ-կատարող Վահան Արծրունիի, փաստաբան Հայկ Ալումյանի, լրագրող Արամ Աբրահամյանի, դերասան Աշոտ Ադամյանի, երգիծաբան Սերգեյ Դանիելյանի, Վիտամին ակումբի անդամներ Արամ MP3-ի, Գարիկ Պապոյանի, Վաչե Թովմասյանի, Արման Խաչատրյանի, Տիգրան Գեւորգյանի, Տիկնիկային թատրոնի տնօրեն Ռուբեն Բաբայանի անունից:

Հայաստանի Հանրային ծառայությունները կարգավորող հանձնաժողովը հունիսի 17-ին որոշում է կայացրել էլեկտրաէներգիայի սակագինը բարձրացնել 6,93 դրամով: Հունիսի 19-ին Երևանի կենտրոնում`Ազատության հրապարակում, մեկնարկել է բողոքի ակցիա`հանրահավաք, այնուհետև` նստացույց: Ակցիայի մասնակիցները հունիսի 22-ին շարժվել են դեպի Բաղրամյան պողոտա` չենթարկվելով` հասարակական կարգը չխախտելու ոստիկանության հորդորներին: Ոստիկանությունը ջրցան մեքենաների կիրառմամբ հունիսի 23-ի առավոտյան ցրել է ակցիան: Արդյունքում 237 մարդ բերման են ենթարկվել, 25-ը դիմել են բժիշկների օգնությանը: Հունիսի 23-ի երեկոյան կրկին հավաք է անցկացվել Ազատության հրապարակում՝ վերածվելով երթի կրկին դեպի Բաղրամյան պողոտա, որտեղ էլ մինչ այժմ այն շարունակվում է:








youtube

Բոլոր նորությունները    


Գործակալության մասին

Հասցե՝ Հայաստան, 0002, Երեւան, Սարյան փող 22, Արմենպրես
Հեռ.՝ +374 11 539818
Էլ-փոստ՝ [email protected]
settings Էջի կարգավորումներ