1000х90.jpg (78 KB)

Երևանում՝ 11:07,   29 Մարտ 2024

Րաֆֆի Գրիգորյանն ու Ալեքսիս Օհանյանը հայկական ստարտափերին համաշխարհային շուկա մտնելու գաղտնիքներ են փոխանցում

Րաֆֆի Գրիգորյանն ու Ալեքսիս Օհանյանը հայկական ստարտափերին 
համաշխարհային շուկա մտնելու գաղտնիքներ են փոխանցում

ԵՐԵՎԱՆ, 29 ԱՊՐԻԼԻ, ԱՐՄԵՆՊՐԵՍ: Տեղեկատվական տեխնոլոգիաների ոլորտի համաշխարհային հսկաներ` «Թվիթեր» սոցիալական ցանցի նախկին փոխնախագահ Րաֆֆի Գրիգորյանն ու Reddit սոցիալական կայքի համահիմնադիր ու գործադիր տնօրեն Ալեքսիս Օհանյանը, հետաքրքիր խորհուրդներ են տալիս հայկական ստարտափերին` ինչպես լինել հաջողակ ու ինչպես դուրս գալ համաշխարհային շուկաներ:  

«Թվիթեր» սոցիալական ցանցի նախկին փոխնախագահ, այժմ ամերիկյան Uber ընկերության ինժեներական բաժնի ղեկավար Րաֆֆի Գրիգորյանը կարծում է, որ Հայաստանում լավ հնարավորություններ կան տեխնոլոգիական ոլորտի առաջադեմ գաղափարների ու սկսնակ ընկերությունների համար: Նրա կարծիքով` բացը միայն կազմակերպչական հմտությունների մեջ է, որը կարելի է հարթել արդեն կայացած մասնագետների հետ հանդիպումների միջոցով: «Թումո» ստեղծարար տեխնոլոգիաների կենտրոնում կայացած HIVE ինժեներական համաժողովի ժամանակ, պատասխանելով «Արմենպրես»-ի հարցերին, Րաֆֆի Գրիգորյանը նշեց, որ բաց է նոր գաղափարների ու հրաշալի մտահղացումների համար: Հարցին ի պատասխան, թե արդյոք, նա պատրաստվում է աջակցել հայկական որևէ սկսնակ ընկերության, նա պատասխանեց. «Ես նման մի բան արել եմ նաև անցած տարի, երբ դասախոսություն կարդացի: Իմ կարծիքով այսպես է ստեղծվում արտադրանքը, այսպես են ստեղծվում թիմերը: Ես իսկապես կարծում եմ, որ իրական հնարավորություն կա մեզ համար այս երկրում: Մենք անհավանական խելացի ենք և պետք է օգտագործենք այս հնարավորությունը: Միակ բանը, որ բացակայում է, կազմակերպչական կողմն է. ինչպե՞ս դա կազմակերպել, առաջնորդել, ինչպե՞ս մոտենալ այդ հարցին: Ուստի ես հույս ունեմ, որ նման միջոցառումների միջոցով, դրանց պարբերական բնույթ տալով` մենք կկարողանանք փոխել մեր մտածելակերպը` որոշ ձևով մուտք գործելով համաշխարհային համացանցային տնտեսություն»:

Րաֆֆի Գրիգորյանը նշեց, որ խորհրդատու է Հայաստանում գործող «Գրանատուս» վենչուրային հիմնադրամում, ինչպես նաև ներդրումներ է կատարել HIVE-ում, որը հայկական և արտասահմանյան ընկերությունները կապող ցանց է, այն մենթորային և ֆինանսական աջակցություն է ցուցաբերում հայկական սկսնակ ընկերություններին:

«Ցանկացած հայ` լինի Լոս Անջելեսում, Լոնդոնում, թե Հայաստանում, եթե դիմի ինձ, ես ավելի արագ կարձագանքեմ, քան մյուսներին: Ուստի, եթե հայեր կան, ովքեր ցանկանում են իրենց գաղափարներով կիսվել, թող գրեն իմ էլեկտրոնային փոստին»,-ասաց Րաֆֆի Գրիգորյանը:

Անդրադառնալով հարցին, թե Հայաստանն ու հայ մասնագետները ինչով կարող են գրավիչ լինել համաշխարհային տեխնոլոգիական շուկայում` մասնագետը նշեց. «Անկեղծ ասած, այսօր աշխարհին հետաքրքիր է ամեն ինչ: Ներկայում հատկապես թեժ հետաքրքրություն կա հաղորդագրություններին (messaging), սոցիալական համայնքներին առնչվող հարթակում: Իրականում այնքան էլ կարևոր չէ, թե այդ ամենը որտեղ է ստեղծվել, կարևոր է, թե ինչպես դա հասցնել սպառողին և թե որտեղ է այդ սպառողը գտնվում: Օրինակ, եթե ես լինեի Հայաստանում արտադրություն ծավալող մարդկանցից, ես հավանաբար կկենտրոնանայի Եվրոպայի կամ Մերձավոր Արևելքի վրա: Պետք է սպառողական շուկան կառուցել այնտեղ, որտեղ ավելի հեշտ է, անգամ եթե դա երկրի սահմաններից դուրս է»:

Աշխարհի 27 կայքերի ցանկում հայտնված Reddit սոցիալական կայքի համահիմնադիր ու գործադիր տնօրեն Ալեքսիս Օհանյանը ևս կցանկանար աջակցել հայկական սկսնակ ընկերություններին: «Այս հարցը պետք է տրվի իմ իրավաբանին: Ես չգիտեմ, թե իրավական և հարկային առումով  ինչ է անհրաժեշտ հայկական ընկերությունում ներդրումներ կատարելու համար: Բայց ես կցանկանայի ուղի գտնել աջակցելու սկսնակներին և հայկական ընկերություններին»,-նշեց նա` ի պատասխան մեր հարցադրմանը:

Անդրադառնալով հայ երիտասարդ մասնագետների ներուժին և համաշխարհային շուկայում նրանց գրավչության բարձրացմանը` Ալեքսիս Օհանյանը կարևորեց շատ աշխատանքն ու նաև «բախտը»:

Լուսանկարը`tumo.org


Բաժանորդագրվեք մեր ալիքին Telegram-ում






youtube

AIM banner Website Ad Banner.jpg (235 KB)

Բոլոր նորությունները    


Digital-Card---250x295.jpg (26 KB)

12.png (9 KB)

Գործակալության մասին

Հասցե՝ Հայաստան, 0002, Երեւան, Սարյան փող 22, Արմենպրես
Հեռ.՝ +374 11 539818
Էլ-փոստ՝ [email protected]