ԵՐԵՎԱՆ, 17 ԱՊՐԻԼԻ, ԱՐՄԵՆՊՐԵՍ: Իտալիայի ոստիկանությունը ձերբակալել է 15 մուսուլման գաղթականների, որոնք, ինչպես կասկածում են, Իտալիա անօրինական ներգաղթյալների փոխադրող նավից դուրս են նետել 12 քրիստոնյաների, տեղեկացնում է «Արմենպրես»-ը՝ հղում անելով BBC-ին:

Ականատեսների ասելով՝ նավի վրա վեճ է բռնկել, որի ընթացքում Գանայից եւ Նիգերիայից քրիստոնյա գաղթականներին ծովն են նետել: Ենթադրվում է, որ նրանք բոլորն էլ զոհվել են:

Իտալիայի իրավապահ մարմինների տվյալներով՝ փչովի նավակում ընդամենը եղել է 105 մարդ:

Սիցիլիական Պալերմո քաղաքի ոստիկանությունը հաղորդել է, որ ձերբակալվածներին մեղադրանքներ են առաջադրվել կրոնական հողի վրա ծանրացուցիչ հանգամանքներում սպանություններ կատարելու համար:

Մեղադրյալները Գվինեայից, Մալիից, Կոտ դ՛Իվուարից եւ Սենեգալից սերվածներ են:

Նաեւ հաղորդվում է, որ Հյուսիսային Աֆրիկայից Իտալիա գաղթականների փոխադրող մեկ այլ նավակ ապրիլի 16-ին շրջվել է Միջերկրական ծովում, ինչի հետեւանքով խեղդվել է 40 մարդ: Ըստ որոշ տվյալների՝ ապրիլի 15-ին համանման հանգամանքներում զոհվել են 400-ից ավելի գաղթականներ:

ՄԱԿ-ի փախստականների գործերի գործակալության տվյալներով՝ 2014 թվականին Միջերկրական ծովում զոհվել է գրեթե 3,5 հազար մարդ, որոնք փորձել են հասնել Եվրոպա: