Երևանում՝ 11:07,   20 Ապրիլ 2024

Հայ ժողովուրդը բացառիկ առաքելություն է կրում ցեղասպանությունների կրկնությունը կանխարգելելու հարցում. Սերժ Սարգսյան

Հայ ժողովուրդը բացառիկ առաքելություն է կրում ցեղասպանությունների կրկնությունը 
կանխարգելելու հարցում. Սերժ Սարգսյան

ԵՐԵՎԱՆ, 23 ՀՈԿՏԵՄԲԵՐԻ, ԱՐՄԵՆՊՐԵՍ: Մենք հավատում ենք, որ ողջ մարդկությունը պետք է հետևողական լինի հանցագործությունների հանցագործության ճանաչման, դատապարտման և ժխտման բացառման հարցում: Ինչպես հաղորդում է «Արմենպրես»-ը, այս մասին The New York Times-ում հրապարակված ներդիրում տպագրված հարցազրույցում նշել է ՀՀ Նախագահ Սերժ Սարգսյանը: Նա այս միտքը բնորոշել է որպես Հայոց ցեղասպանության 100-ամյակի նախաշեմին Միացյալ Նահանգների կառավարությանն ու հանրությանն ուղղված հիմնական ուղերձ:

Նույնիսկ այսօր մարդկությունը շարունակում է ականատես լինել ցեղասպանության նման հրեշավոր հանցագործությունների: «Պատմությունը շարունակելու է կրկնվել մինչև անցյալի հանցագործությունները հստակ գնահատական չստանան: Այսօր որպես ցեղասպանություն վերապրած ժողովուրդ մենք որոշակի պարտավորություն ենք զգում, քանի որ կրում ենք բացառիկ առաքելություն կանխարգելելու ցեղասպանությունների կրկնությունը»,- ընդգծում է Սերժ Սարգսյանը:

Նրա խոսքով` Հայոց ցեղասպանությունն անառարկելի փաստ է` արձանագրված միջազգային հանրության կողմից, որն ապաստան է տրամադրել հարյուր հազարավոր հայերի, ովքեր փախչել են Օսմանյան կայսրությունում ջարդերից: «Այսօր նույնիսկ թուրքական հասարակության ուսյալ շերտերը հաշտվել են իրենց անցյալի հետ` դեմ դուրս գալով պետության պաշտոնական ժխտողական դիրքորոշմանը»,- նշել է Սարգսյանը:

Երկրի ղեկավարը շեշտել է նաև, որ քանզի մարդու իրավունքներն ու հիմնարար ազատությունները միջազգային հանրության համար դարձել են բացարձակ արժեք, Հայոց ցեղասպանության ճանաչումը քաղաքական շահերին ստորադասելը հակասում է ներկայիս աշխարհակարգի բարոյական և իրավական նորմերին: «ԱՄՆ-ի հզորությունը նույնպես պայմանավորված է այս արժեքների հանդեպ իր հանձնառությամբ: ԱՄՆ-ի օրենսդիր մարմինն ընդունել է Հայոց ցեղասպանության ճանաչման վերաբերյալ ութ որոշում, այն պաշտոնապես ճանաչվել է ԱՄՆ 40 նահանգներում: 1980-ականների Ռեյգանի վարչակազմը ճանաչել և դատապարտել է Հայոց ցեղասպանությանը: Վաղ թե ուշ Թուրքիան ևս ստիպված կլինի հաշտվել իր պատմության հետ և ազատել ինքն իրեն` վերահաստատելով արդարությունը»,- ամփոփել է ՀՀ Նախագահը:


Բաժանորդագրվեք մեր ալիքին Telegram-ում






youtube

AIM banner Website Ad Banner.jpg (235 KB)

Բոլոր նորությունները    


Digital-Card---250x295.jpg (26 KB)

12.png (9 KB)

Գործակալության մասին

Հասցե՝ Հայաստան, 0002, Երեւան, Սարյան փող 22, Արմենպրես
Հեռ.՝ +374 11 539818
Էլ-փոստ՝ [email protected]