ԳԱՎԱՌ, 20 ՄԱՅԻՍԻ, ԱՐՄԵՆՊՐԵՍ: Սեւանա լճի մակարդակը, 2014 թվականի մայիսի 20-ի դրությամբ, ծովի մակերեւույթից գտնվել է 1900 մետր 42 սանտիմետր բարձրության վրա, որը հավասար է նախորդ տարվա նույն օրվա նիշին:

Ինչպես «Արմենպրես»-ին տեղեկացրին Գավառի` Օրհուսի բնապահպանական տեղեկատվական կենտրոնից, մայիսի 20-ի դրւթյամբ` Սեւանա լճից ոռոգման եւ էներգիայի արտադրության նպատակներով բաց է թողնվել 45 միլիոն 516 հազար խորանարդ մետր ջուր: Փոխարենը «Արփա-Սեւան» թունելային ջրատարով Սեւանա լիճ է մուտք գործել 45 միլիոն 697 հազար խորանարդ մետր ջուր:

Այս տարվա ընթացքում Սեւանը սնած ստորերկրյա ջրերի հոսքը կազմել է 17 միլիոն 71 հազար խորանարդ մետր ջուր: Որոշակի մուտքեր լճի համար ապահովել են նաեւ Սեւան թափվող գետերն ու գետակները, որոնց ելքերը վերջին օրերին որոշակիորեն նվազել են, սակայն տեղումները որոշալի ծավալով լրացնում են լճի ջրային պաշարները:

Խոսրով Խլղաթյան