1000х90.jpg (78 KB)

Երևանում՝ 11:07,   28 Մարտ 2024

Կոնստանտին Օրբելյանի աճյունը կտեղափոխվի Հայաստան

Կոնստանտին Օրբելյանի աճյունը կտեղափոխվի Հայաստան

ԵՐԵՎԱՆ, 7 ՄԱՅԻՍԻ, ԱՐՄԵՆՊՐԵՍ: Կյանքի 86-րդ տարում վախճանված ԽՍՀՄ և ՀԽՍՀ ժողովրդական արտիստ Կոնստանտին Օրբելյանի աճյունն ապրիլի 10-ի կեսօրին կտեղափոխվի Հայաստան: Ինչպես «Արմենպրես»-ին տեղեկացրին Հայաստանի կոմպոզիտորների միությունից, ԱՄՆ-ում մայիսի 6-ին տեղի է ունեցել անվանի գործչի հոգեհանգստի արարողությունը: «Երկրպագուները և Օրբելյանի գործը գնահատողները հնարավորություն կունենան վերջին անգամ հրաժեշտ տալ ԽՍՀՄ և ՀԽՍՀ ժողովրդական արտիստին մայիսի 11-ին` ժամը 11-ից 14-ը` «Արամ Խաչատրյան» համերգասրահում: Կոնստանտին Օրբելյանին կհուղարկավորեն Պանթեոնում»,- տեղեկացրին Կոմպոզիտորների միությունից:

Կոնստանտին Օրբելյանը ծնվել է 1928թ. հուլիսի 29-ին, Ռուսաստանի Արմավիր քաղաքում: Երաժշտական ունակությունները ի հայտ են եկել դեռ մանուկ հասակում: Վաղ տարիքից սովորել է Բաքվի կոնսերվատորիային կից տաղանդավոր երեխաների համար նախատեսված երաժշտական հատուկ դպրոցում: Ծնողները դարձել են ստալինյան բռնությունների զոհ, որի պատճառով նրան հեռացրել են դպրոցից և եղբայրների հետ տեղափոխվել է Լեռնային Ղարաբաղի փոքրիկ գյուղերից մեկը: 1942թ. աշխատել է ավիացիոն կորպուսի ջազային խմբում` որպես դաշնակահար և ակորդեոնահար: Որոշ ժամանակ անց, ռազմական նվագախմբի հետ համերգներով հադես է եկել Երևանում, ապա տեղափոխվել Հայաստանի էստրադային նվագախումբ: 1945թ-ից նվագախմբի համար վերամշակել է ժողովրդական երգեր, ինչպես նաև ստեղծել է նոր մեղեդիներ: Առաջին գործերից է «Օրորոցայինը»: 1952թ. ընդունվել է Երևանի Ռ. Մելիքյանի անվան երաժշտական ուսումնարան, որից հետո` Երևանի Կոմիտասի  անվան պետական կոնսերվատորիա: 1955թ. գրել է «Սիրտը երգում է» ֆիլմի երաժշտությունը: 1956թ-ից եղել է Հայաստանի էստրադային նվագախմբի դիրիժորն ու գեղարվեստական ղեկավարը: 1957թ. դարձել է ԽՍՀՄ Կոմպոզիտորների միության անդամ: 1962թ. Մոսկվայում անցկացվող ԽՍՀՄ երիտասարդ կոմպոզիտորներ մրցույթի հաղթող է ճանաչվել: 1969թ. գրել է «Անմահություն» բալետը: 36 տարի գլխավորել է Հայաստանի պետական էստրադային նվագախումբը: Նրա հայտնի երգերը, բազմաթիվ կատարողների ներկայացմամբ, արժանացել են մի շարք մրցանակների` «Երգել, նշանակում է ապրել», «100 երջանիկ ժամեր», «Շնորհակալություն կյանքին», «Սերը չի ծերանում», «Դու այն չէս, ով պետք է ինձ», «Հիշեք» և այլն: 1974թ. արժանացել է ՀԽՍՀ, 1979թ.` ԽՍՀՄ ժողովրդական արտիստի կոչմանը: 1992թ. մեկնել է ԱՄՆ և բնակություն հաստատել Սան Ֆրանցիսկոյում: 2012թ. պարգևատրվել է ՀՀ Պատվո շքանշանով:

2013 թվականին սեպտեմբերին ԽՍՀՄ եւ ՀՀ ժողովրդական արտիստ Կոնստանտին Օրբելյանի 85-ամյա հոբելյանի առթիվ «Արամ Խաչատրյան» համերգասրահում կայացել էր մեծ համերգ, որը մաեստրոն պատվել էր իր ներկայությամբ: 1992 թվականից ԱՄՆ մեկնած եւ Սան-Ֆրանցիսկոյում բնակություն հաստատած կոմպոզիտոր, դաշնակահար Օրբելյանի ծննդյան 80 եւ ստեղծագործական գործունեության 65-ամյակները 2008 թվականին մեծ համերգային ծրագրով էին նշվել Ալ. Սպենդիարյանի անվան օպերայի եւ բալետի ազգային ակադեմիական թատրոնում:

2011 թվականի ամռանը «Արամ Խաչատրյան» համերգասրահում կայացել էր եւս մեկ համերգ` նվիրված Օրբելյանների ընտանիքին: Համերգին հանդես էր եկել նաեւ մաեստրոյի եղբորորդին`անվանի դիրիժոր Կոնստանտին Օրբելյան կրտսերը:


Բաժանորդագրվեք մեր ալիքին Telegram-ում






youtube

AIM banner Website Ad Banner.jpg (235 KB)

Բոլոր նորությունները    


Digital-Card---250x295.jpg (26 KB)

12.png (9 KB)

Գործակալության մասին

Հասցե՝ Հայաստան, 0002, Երեւան, Սարյան փող 22, Արմենպրես
Հեռ.՝ +374 11 539818
Էլ-փոստ՝ [email protected]