ՎԻԵՆՆԱ, 27 ՄԱՐՏԻ, ԱՐՄԵՆՊՐԵՍ: Ավստրիայում երկկողմ պաշտոնական այցով գտնվող Սերբիայի Հանրապետության նախագահ Տոմիսլավ Նիկոլիչը, երկրի ԱԳ և ՊՆ նախարարների և պաշտոնական այլ անձանց ուղեկցությամբ մարտի 27-ին այցելել է Վիեննայի Մխիթարյան միաբանություն՝ վանքի արխիվներում պահվող և մխիթարյանների տպագրած ավելի քան 300 անուն սերբալեզու հնատիպ գրքերին ծանոթանալու նպատակով:

«Արմենպրես»-ի հաղորդմամբ` Վիեննայի Մխիթարյան միաբանության վանահայր Հայր Պողոս Գոճանյանը բարձրաստիճան հյուրին ծանոթացրել է միաբանության գործունեության հետ: Նախագահը և նրան ուղեկցող պատվիրակության անդամները շրջայց են կատարել եկեղեցում, գրադարանում և թանգարանում: Վանական համալիրի մամուլի սրահում այցելուները ծանոթացան հատուկ Նախագահի այցի կապակցությամբ ցուցադրված 19-րդ դարի սերբական գրականության նմուշների հետ. հայտնի սերբ բանասեր Վուկ Կարաջիչի երկեր, սերբական առաջին Աստվածաշունչը, բառարաններ, ժողովրդական ու ազատագրական երգերի ժողովածուներ:

Նախագահ Նիկոլիչը գրառում է կատարել միաբանության հուշագրքում: Սերբական բարձրաստիճան պատվիրակության այցը հարգանքի տուրք էր սերբական մշակույթի կայացման գործում միաբանության ունեցած անուրանալի վաստակի հանդեպ: