ԵՐԵՎԱՆ 23 ՀՈՒՆՎԱՐԻ ԱՐՄԵՆՊՐԵՍ: ԵԱՀԿ Մինսկի խմբի ամերիկացի համանախագահ Ջեյմս Ուորլիքը Փարիզում հունվարի 24-ին Հայաստանի ու Ադրբեջանի արտաքին գործերի նախարարների հանդիպումից սպասելիքներ ունի: «Արմենպրես»-ի հաղորդմամբ` թվիթերյան իր միկրոբլոգում նա հույս է հայտնել, որ ԱԳ նախարարների հանդիպումը փետրվարին նախագահների մակարդակով ակնկալվող հանդիպման նախապատրաստման համար քայլ առաջ կարձանագրի:

Նոյեմբերի 19-ին Վիեննայում Հայաստանի եւ Ադրբեջանի նախագահների հանդիպումից հետո երկու երկրների արտաքին գործերի նախարարներին հանձնարարվեց շարունակել հանդիպումները Լեռնային Ղարաբաղի հակամարտության կարգավորման ուղղությամբ: Դեկտեմբերին Հայաստանի եւ Ադրբեջանի արտաքին գործերի նախարարները հանդիպեցին Կիեւում ԵԱՀԿ նախարարների խորհրդի ամենամյա համաժողովի շրջանակներում: Հունվարի 24-ին սպասվող հանդիպումից 4 օր առաջ Ադրբեջանը դիվերսիոն գործողություններ է իրականացրել ղարաբաղյան դիրքերի նկատմամբ, ինչի արդյունքում երկուստեք զոհեր են գրանցվել: Ըստ ՀՀ պաշտպանության նախարար Սեյրան Օհանյանի` իրավիճակի լարվածությունը սահմանագծին հասել է գագաթնակետին: