ԵՐԵՎԱՆ, 7 ԴԵԿՏԵՄԲԵՐԻ, ԱՐՄԵՆՊՐԵՍ: Հանրապետությունում 2013թ.-ի հունվար-հոկտեմբերին գրանցված հանցագործությունների քանակը գերազանցում է նախորդ տարվա նույն ժամանակահատվածում գրանցված ցուցանիշը:  Ինչպես «Արմենպրես»-ը տեղեկացել է ՀՀ ազգային վիճակագրական ծառայությունից, այս տարի այն հասել է 15 հազար 479-ի` նախորդ տարվա 12 հազար 840-ի փոխարեն:

2013թ.-ին ոչ մեծ ծանրության հանցագործությունների թիվն անցել է 8 հազարի շեմը, սակայն նախորդ տարի այն եղել է շուրջ 7 հազար: Միջին ծանրության հանցագործություններն այս տարի շուրջ 1000 դեպքով գերազանցել են նախորդ տարվա ցուցանիշը: 2012թ.-ին այն եղել է 3 հազար 786:

Այս տարվա առաջին տասն ամիսների ընթացքում հանրապետությունում գրանցվել է շուրջ 2 հազար 500 ծանր հանցագործություն, սակայն նախորդ տարվա նույն ժամանակահատվածում դրանց քանակը եղել է 500-ով պակաս:

Գրանցված հանցագործությունների ընդհանուր թվում միայն առանձնապես ծանր հանցագործություններն են, որոնք նախորդ տարվա համեմատությամբ նվազել են: Եթե 2012թ.-ի հունվար-հոկտեմբերի ընթացքում գրանցվել է առանձնապես ծանր հանցագործության 143 դեպք, ապա այս տարվա նույն ժամանակահատվածում դրանց քանակը 28-ով նվազել է: