Ռուսատանը 57 տոկոսով ավելացրել է Հայաստանից ձկան ներմուծումը
ԵՐԵՎԱՆ, 14 ՆՈՅԵՄԲԵՐԻ, ԱՐՄԵՆՊՐԵՍ: Հայաստանի Հանրապետությունից արտահանվող կենդանի ձկների ծավալը հունվար-սեպտեմբերին նախորդ տարվա նույն ժամանակահատվածի համեմատ 4,6 տոկոսով աճել է և կազմել 13,6 տոննա: Կենդանի ձկան ողջ ծավալը Վրաստան է ուղարկվել: ՀՀ կառավարությանն առընթեր պետական եկամուտների կոմիտեի տվյալներով` նախորդ տարվա ինն ամիսներին Հայաստանից արտահանվել էր 13 տոննա կենդանի ձուկ: «Արմենպրես»-ի հաղորդմամբ՝ հունվար-սեպտեմբերին 57,5 տոկոսով աճել է մեր երկրից թարմ կամ պաղեցրած ձկան արտահանումը և կազմել 1410 տոննա, որի մաքսային ընդհանուր արժեքը գերազանցել է 10,6 միլիոն դոլարը: ՀՀ-ից հունվար-սեպտեմբերին արտահանված թարմ կամ պաղեցրած ձկան գրեթե ողջ ծավալը՝ 1406,6 տոննան Ռուսաստանն է գնել, ինչը նախորդ տարվա նույն ժամանակահատվածի ցուցանիշը գերազանցել է 57,36 տոկոսով:
Հայաստանից ամբողջ 2012թ.-ին արտահանվել է 16.9 տոննա կենդանի ձուկ` 2011թ.-ի 13 տոննայի դիմաց: Հատկանշական է, որ նախորդ տարի դարձյալ Վրաստանն է գնել Հայաստանից արտահանված կենդանի ձկների ամբողջ ծավալը: Անցյալ տարի Հայաստանից արտահանվել է 1662,8 տոննա թարմ կամ պաղեցրած ձուկ՝ գրեթե ամբողջ ծավալով Ռուսաստան:
Բաժանորդագրվեք մեր ալիքին Telegram-ում