ԵՐԵՎԱՆ, 18 ՍԵՊՏԵՄԲԵՐԻ, ԱՐՄԵՆՊՐԵՍ: «Ստանդարտ» բանկի շուկաների զարգացման վերլուծաբան Թիմ Էաշն առաջարկում է հայկական դոլարային պարտատոմսերն անվանել «Քարդաշյան»` ավելի ճանաչելի լինելու համար: Ինչպես հաղորդում է «Արմենպրես»- ը, այս մասին գրում է The Wall Street Journal-ի բլոգը` հաղորդելով, որ առաջիկա շաբաթներին Հայաստանը պատրաստվում է թողարկել դոլարային պարտատոմսեր: Ըստ վերլուծաբանի` հայկական հզոր համայնքներն ԱՄՆ-ում և Ֆրանսիայում հնարավոր է աջակցեն պարտատոմսերին մականուն տալու գործին:

Ավանդաբար Միացյալ Նահանգներից դուրս թողարկվող պարտատոմսերին տրվում են մականուններ, օրինակ` ավստրալական պարտատոմսերը կոչվում են «կենգուրու», ճապոնականները` «սամուրայ», մոնղոլականները` «Չինգիզ»: Հայաստանը նոր է ավարտել իր արժեթղթերի ներկայացումը` հետաքրքրություն առաջացնելով իր դոլարային պարտատոմսերի նորամուտի նկատմամբ: «Ի նկատի ունենալով, որ Հայաստանը հայտնի է ծիրանով` պարտատոմսերը կարող էին անվանվել «ծիրան», սակայն քիչ կլիներ հավանականությունը, որ դրանք մեծ հետաքրքրություն կառաջացնեին աշխարհում, ինչը չի կարելի ասել «Քարդաշյան» անվան դեպքում»,- մեկնաբանում է բլոգը: