ԵՐԵՎԱՆ, 8 ԱՊՐԻԼԻ, ԱՐՄԵՆՊՐԵՍ: Հայոց ցեղասպանությանը նվիրված հուշարձան է կանգնեցվել Միացյալ Նահանգների Միչիգան նահանգի Թրոյ քաղաքի Riverfront զբոսայգում: Ինչպես հաղորդում է «Արմենպրես»-ը` վկայակոչելով The Record պարբերականը, հուշարձանի կանգնեցման նախագիծը կյանքի է կոչվել «Վարդանի դուստրեր և որդիներ» կազմակերպության և Հայոց ցեղասպանության զոհերի հիշատակի հուշարձանների կոմիտեի համանախագահ Ռալֆ Ենոքյանի ջանքերով: 

Բացման արարողությունից առաջ ցեղասպանության զոհերի հոգու հանգստի համար աղոթք է կարդացել Հայ առաքելական Սուրբ Պետրոս եկեղեցու վանահայր Ստեփանոս Դուդուքչյանը` խնդրելով Աստծու ողորմածությունը 1915 թվականին Արևմտյան Հայաստանում, Սիրիայում և այլ վայրերում զոհված հայորդիների հոգու համար: Արարողությանը ներկա են եղել տեղական պաշտոնյաներ և շրջանի ավելի քան երկու հազար հայերին սպասարկող հայ համայնքի ներկայացուցիչներ:

Նախագիծը առաջարկվել էր մոտ ութ տարի առաջ` քաղաքային խորհրդի կողմից, սակայն հուշարձանի կանգնեցումն անընդհատ հետաձգվել է վայրի հստակեցված չլինելու պատճառով: