Ավստրալիան անհանգստացած է Սաֆարովի արտահանձման փաստի առնչությամբ
ԵՐԵՎԱՆ, 28 ՍԵՊՏԵՄԲԵՐԻ, ԱՐՄԵՆՊՐԵՍ: Ավստրալիայի Արտաքին գործերի եւ առեւտրի նախարարությունը քննադատել է ոճրագործ Ռամիլ Սաֆարովին ներում շնորհելու փաստը` միանալով հունգարա-ադրբեջանական հանցավոր գործարքի դատապարտման միջազգային շարժմանը: Ինչպես «Արմենպրես»-ին տեղեկացրին Ավստրալիայի Հայ դատի հանձնախմբից, ի պատասխան հանձնախմբի` Ավստրալիայի ԱԳ նախարար Բոբ Կարին ուղղած նամակին, Արտաքին գործերի եւ առեւտրի նախարարությունից նշել են. «Ավստրալիայի կառավարությունը մտահոգված է Սաֆրովին Իլհամ Ալիեւի կողմից ներում շնորհելու առնչությամբ: Ադրբեջանի գործողություններն ունեն Լեռնային Ղարաբաղի հակամարտության կարգավորման ԵԱՀԿ ՄԽ-ի կողմից շարունակվող միջնորդության ջանքերը քայքայելու ներուժ»: Ավսրալիայի Հայ դատի հանձնախմբի գործադիր տնօրենը ողջունել է Ավստրալիայի կառավարության այս հայտարարությունը:
Բուդապեշտում ՆԱՏՕ-ի դասընթացներին մասնակցկող հայ սպա Գուրգեն Մարգարյանին 2004-ի փետրվարի 19-ին քնած ժամանակ դաժանաբար կացնահարած ադրբեջանցուն` Ռամիլ Սաֆարովին, Հունգարիան արտահանձնել է Ադրբեջանին: Չնայած ոճրագործը հունգարական դատարանի կողմից դատապարտվել էր ցմահ ազատազրկման` 30 տարի առանց ներման իրավունքի, մարդասպանը հայրենիքում ոչ միայն ազատ է արձակվել, այլեւ մայորի կոչում ստացել: Հայաստանը որոշում է կայացրել Հունգարիայի հետ դիվանագիտական հարաբերությունները կասեցնելու մասին:
Հունգարա-ադրբեջանական հանցավոր գործարքը դատապարտող հայտարարություններով են հանդես եկել տարբեր միջազգային եւ տեղական կազմակերպություններ, քաղաքական ուժեր եւ գործիչներ: Հունգարիան արդեն հայտնել է Հայաստանի հետ դիվանագիտական հարաբերությունները վերականգնելու պատրաստակամության մասին:
Բաժանորդագրվեք մեր ալիքին Telegram-ում