«Հարսնաքար»-ում մոմեր են վառվում Վահե Ավետյանի հիշատակին
ԵՐԵՎԱՆ, 7 ՕԳՈՍՏՈՍԻ, ԱՐՄԵՆՊՐԵՍ: Ռազմական բժիշկ Վահե Ավետյանի մահվան քառասուն օրվա կապակցությամբ «Հարսնաքար» ռեստորանային համալիրի առջեւ մոմավառության արարողությանը մասնակցում են քաղաքական գործիչներ, քաղաքացիական-հասարակական նախաձեռնության անդամներ:
Ինչպես հաղորդում է «Արմենպրես»-ի թղթակիցը` մոմավառության մասնակիցների թվում են ԱԺ նախկին պատգամավորներ Լիլիթ Գալստյանը, Լարիսա Ալավերդյանը, «Սարդարապատ» նախաձեռնության անդամ Տիգրան Խզմալյանը եւ ուրիշներ:
Լիլիթ Գալստյանի խոսքով` ակցիայի մասնակիցները նախ եւ առաջ եկել են հարգելու Վահե Ավետյանի հիշատակը: ԱԺ նախկին պատգամավորը կարեւորեց պետության աջակցությունը յուրաքանչյուր քաղաքացու պաշտպանության հարցում:
Նախաձեռնության կազմակերպիչները մասնակիցներին բաժանեցին մոմեր։ Մոմավառության ընթացքին հետեւում են Երեւանի ոստիկանության աշխատակիցները: Այն ընթանում է խաղաղ, առանց միջադեպերի: Մոմավառության ակցիայի մասնակիցները երթով անցնելու են ՀՖՖ նախագահ Ռուբեն Հայրապետյանի տան մոտով:
Հունիսի 17-ին «Հարսնաքար» ռեստորանային համալիրում դաժան ծեծի էին ենթարկվել երեք բժիշկներ, որոնց թվում էր ռազմական բժիշկ Վահե Ավետյանը, ով հունիսի 29-ին հիվանդանոցում մահացել էր:
Հարուցված քրգործի շրջանակներում կալանավորվել է 6 մարդ` Արման Խաչատրյանը, Նորայր Հայրապետյանը, Գարիկ Մարգարյանը, Արման Բաղդասարյանը, Դավիթ Ադամյանն ու Արթուր Բաբլոյանը, որոնց մեջ կան նաև Ռուբեն Հայրապետյանի թիկնազորի անդամներ:
Բաժանորդագրվեք մեր ալիքին Telegram-ում