Առաջիկա 50 տարում Հայաստանն աղի խնդիր չի ունենա
ԵՐԵՎԱՆ, 28 ՀՈՒԼԻՍԻ, ԱՐՄԵՆՊՐԵՍ: Հայաստանի Հանրապետության վարչապետ Տիգրան Սարգսյանը հուլիսի 28-ին այցելեց «Ավանի աղի կոմբինատ» ՓԲԸ, շրջեց տարածքով, ծանոթացավ աղի արտադրության բարելավման եւ նորացման նպատակով ընկերության կողմից կատարվող ներդրումային ծրագրերին:
Ինչպես լրագրողների հետ զրույցում նշեց Ավանի աղի կոմբինատի գլխավոր տնօրեն Արեգ Ղուկասյանը, կոմբինատն արտադրում է ինչպես կերակրի, այնպես էլ տեխնիկական աղ:
«Մեր ապրանքի եւ որակի մրցունակությունը պահպանելու համար սկսել ենք երկու նոր ծրագիր: Շվեյցարական ընկերության հետ գործակցում ենք նոր գործարան կառուցելու ուղղությամբ, որի նախագիծն արդեն իսկ պատվիրել ենք: Հուսով ենք` դա կհասցնենք իրագործել 3-4 տարում»,-«Արմենպրես»-ի հաղորդմամբ` ասաց նա:
Ղուկասյանը նշեց, որ սեփական հումք ունենալու նպատակով աղի հանքում նախատեսվում է կառուցել ստորգետնյա հորեր:
«Նախագծերի իրականացման համար ներդրումային ծրագիրը կազմելու է 10մլն եվրո: Առաջիկա 3-4 տարում կառավարության աջակցությունը մեզ համար շատ կարեւոր է: Եթե կարողանանք կառուցել գործարանը, ապա առաջիկա 50 տարիներին Հայաստանը աղի խնդիր չի ունենա»,-ասաց նա::
ՀՀ էկոնոմիկայի նախարար Տիգրան Դավթյանը նշեց, որ աղի կոմբինատը կարողացել է այս անցումային ժամանակահատվածում արդիականացման էական ծրագիր իրականացնել: Այն կարողացել է ապահովել ոչ միայն շահութաբերություն, այլեւ ավելացնել ծավալները:
«Այն, ինչ մենք տեսանք` բավարար հիմքեր է տալիս համոզվելու, որ ձեռնարկությունը կարող է հաջողությամբ իրականացնել տարբեր ծրագրեր, եւ կառավարությունը պատրաստ կլինի տրամադրել այն աջակցությունը, որն անհրաժեշտ է»,-ասաց նախարարը:
«Ավանի աղի կոմբինատ» ընկերությունը շահագործման է հանձնվել 1969 թվականին: Այն տարեկան 30 հազար տոննայից ավելի աղ է արտադրում, որի մի մասը արտահանում է Վրաստան, իսկ բավականին վերջերս նաեւ Շվեյցարիա:
Բաժանորդագրվեք մեր ալիքին Telegram-ում