Արմեն Աշոտյանը «Հարսնաքար»-ի ողբերգությունը երեք հարթության մեջ է դիտարկում
ԵՐԵՎԱՆ, 9 ՀՈՒԼԻՍԻ, ԱՐՄԵՆՊՐԵՍ: Վերջին շրջանում «Հարսնաքար» ռեստորանային համալիրի շուրջ ծավալված գործողությունների մեջ քաղաքական հարթություն գոյություն չունի:«Արմենպրես»-ի հաղորդմամբ այս մասին հուլիսի 9-ին տեղի ունեցած ասուլիսում ասաց ՀՀԿ փոխնախագահ Արմեն Աշոտյանը: «Այս ողբերգության մեջ ինձ համար երեք հարթություն գոյություն ունի` մարդկային, քաղաքացիական եւ իրավական»,-ասաց նա: Աշոտյանը նշեց, որ այս երեւույթի քաղաքականացման փորձերն ամբողջությամբ բարոյազրկում են քաղաքացիների բարոյական ցասումը:
Հունիսի 17-ին` ժամը 23:00-ի սահմաններում, դաժան ծեծկռտուք է տեղի ունեցել «Հարսնաքար» ռեստորանային համալիրում: Փաստով հարուցվել էր քրեական գործ ՀՀ քրեական օրենսգրքի 112 հոդվածի 1-ին մասով` դիտավորությամբ առողջությանը ծանր վնաս պատճառելը: Ծեծի էր ենթարկվել ՀՀ ՊՆ Երևանի կայազորի հոսպիտալի Ուռոլոգիայի բաժնի պետ, մայոր Վահե Ավետյանը, ով տեղափոխվել էր Մուրացանի զինվորական հոսպիտալ և ենթարկվել գանգուղեղի վիրահատության։ Ավետյանի մոտ ախտորոշվել էր ծանր փակ գանգուղեղային վնասվածք, գլխուղեղի ծանր սալջարդ, սուր հեմատոմա: Վահե Ավետյանը հիվանդանոցում մահացել է հունիսի 29-ին: Տուժել էին նաեւ Արտակ Բայադյանը եւ Գարիկ Սողոմոնյանը, ում առողջական վիճակը միջին ծանրության է:
Ռուբեն Հայրապետյանը հուլիսի 3-ին հայտարարել է պատգամավորական մանդատը վայր դնելու մտադրության մասին:
Բաժանորդագրվեք մեր ալիքին Telegram-ում