Աշխատանքի եւ սոցիալական հարցերի նախարարը ցանկանում է, որ հայ մարդն իրեն ապահով եւ պաշտպանված զգա իր երկրում
ԵՐԵՎԱՆ, 21 ԴԵԿՏԵՄԲԵՐԻ, ԱՐՄԵՆՊՐԵՍ: Ամանորին սպասում են բոլորը` անկախ տարիքից, սեռից, զբաղեցրած դիրքից: Օրվա հետ են մարդիկ կապում իրենց ցանկությունների ու երազանքների իրականցումը: «Արմենպրես»-ը փորձեց ճշտել, թե այդ տոնից ինչ սպասելիքներ ունեն Հայաստանի Հանրապետության գործադիր իշխանության ներկայացուցիչները: Ամանորյա հրաշքից իր ակնկալիքն է ներկայացնում ՀՀ աշխատանքի եւ սոցիալական հարցերի նախարար Արթուր Գրիգորյանը:
- Պարո’ն Գրիգորյան, Ամանորն ունի յուրահատուկ խորհուրդ: Այդ օրը մարդիկ սկսում են երազանքներ պահել, հավատալ հրաշքներին: Իսկ Դուք հավատու՞մ եք արդյոք ամանորյա հրաշքին:
-Ամեն դեպքում փորձում եմ հավատալ:
-Կա՞ արդյոք մի երազանք, ցանկություն, որը պահում եք յուրաքանչյուր Ամանորին, սակայն այն դեռեւս չի իրականացել:
-Ամեն տարիքում ունեցել եմ տարբեր երազանքներ, որոնց մեծ մասն իրականացել է:
-Նվերներ ստանալ սիրում են բոլորը: Լինում են նաեւ նվերներ, որոնք հիշվում են ամբողջ կյանքի ընթացքում: Ո՞րը Դուք կմտաբերեք:
-Հիշում եմ, որ բոլոր ամանորներին նվերներ ստացել եմ, բայց առանձնահատուկ հիշվող չեմ կարող մտաբերել:
-Թեեւ տոնակատարությունները միշտ բերում են խինդ եւ ուրախություն, այնուամենայնիվ, հաճախ այդ օրերն ուղեկցվում են մի շարք հաճելի «հոգսերով», որոնց շարքին են դասվում նաեւ ամանորյա գնումները: Դա Ձեզ համար հո՞գս է թե հաճույք:
-Անկեղծ ասած` զբաղվածության պատճառով շատ վաղուց հնարավորություն չեմ ունեցել ամանորյա գնումներ կատարել: Այդ «հաճելի հոգսն» իր վրա է վերցրել իմ տիկինը, ինչի համար անչափ երախտապարտ եմ նրան:
-Ի՞նչ կմաղթեք այս տարի հայ ժողովրդին:
-Որպես աշխատանքի եւ սոցիալական հարցերի նախարար` մեր ժողովրդին մաղթում եմ արժանավայել աշխատանք, բարեկեցություն եւ համատարած համերաշխություն: Կարեւոր է, որպեսզի հայ մարդն իրեն ապահով եւ պաշտպանված զգա իր երկրում: Թող Նոր` 2012 թվականին իրականանան բոլոր երազանքները:
Հարցազրույցը` Արուսիկ Զախարյանի
Բաժանորդագրվեք մեր ալիքին Telegram-ում