ՅՈՒՆԵՍԿՕ-ն սխալվել է` հարիսան թուրքական կերակուր ճանաչելով
ԵՐԵՎԱՆ, 6 ԴԵԿՏԵՄԲԵՐԻ, ԱՐՄԵՆՊՐԵՍ: Հարիսայի ստեղծման հստակ օր կամ ժամանակ չկա, բաց եթե ուշադրություն դարձվի այս կերակրատեսակի բաղադրամասերին, ապա այն զուտ հայկական ծագում ունի:
«Հարիսան` քաշիկան ի սկզբանե, թոնրի մեջ պատրաստվող կերակուր է, որի պատրաստմամբ միայն հայերն են զբաղվել»,- ինչպես հաղորդում է «Արմենպրես»-ը, դեկտեմբերի 7-ին հրավիրված ասուլիսում նշեց Հայկական խոհանոցային ավանդույթների զարգացման եւ պահպանման հասարակական կազմակերպության նախագահ Սեդրակ Մամուլյանը` անդրադառնալով ՅՈՒՆԵՍԿՕ-ի կողմից հարիսան թուրքական ազգային ուտեստ ճանաչվելու որոշմանը: Նա վստահեցրեց, որ հարիսայի հայկական արմատները նույնիսկ կասկածի տեղիք չեն կարող տալ, քանի որ հարուրամյակներ շարունակ ձավարեղենի մշակմամբ զբաղվել է միայն հայ ժողովուրդը:
«Ոչ միայն հարիսան է զուտ հայկական երեւույթ, այլեւ, թոնիրը, ինչպես նաեւ կավից սպասքը»,- պարզաբանեց Մամուլյանը:
Հարիսան դարեր շարունակ պատրաստման իր տեխնոլոգիան է ունեցել, որի ժամանակակից տարբերակը, Մամուլյանի խոսքով`հեռու չէ ավանդականից: Հարիսան պատրաստվել է կամ գառան կամ հավի մսից, նաեւ ընդեղներից` ուտելի խոտաբույսերից, հատիկավորներից:
«Հացահատիկից պատրաստված ցանկացած ճաշատեսակ կապ ունի նստակյաց տնտեսության հետ, ինչի վառ ապացույցն է հայկական բարձրավանդակի ժողովուրդը»,- տեղեկացրեց գրող-հրապարակախոս Լիա Ավետիսյանը: Նա վստահ է, որ թուրքի եւ հայի տարբերություններից մեկն այն է, որ հայ ժողովուրդը եղել է նստակյաց:
«Ցանկացած ճաշատեսակ տեխնոլոգիական կոդ է պարունակում. հարիսա` այսինքն լավ հարի, որ լավ ստացվի»,- հավելեց Ավետիսյանը, ով պատահական չի համարում նաեւ այն, որ հայկական բանակը հարյուրավոր տարիներ շարունակ հայ տղաներին առավոտյան մատուցել է սննդարար եւ «կշտացնող» հարիսա:
«Մենք պետք է սովորենք պահպանել, տիրություն անել մեր մշակութային ժառանգությանը»,- նշեց Հայկական խոհանոցային ավանդույթների զարգացման եւ պահպանման հասարակական կազմակերպության քարտուղար Վահե Անթանեսյանը: Նա տեղեկացրեց, որ այժմ իրենք ակտիվ աշխատանքներ են տանում երիտասարդ մասնագետների կողմից պատմական հիմքերի հրապարակման համար, որտեղ կարեւոր է նաեւ պետական կառույցների, գիտությամբ զբաղվողների արձագանքը եւ աջակցությունը:
«Թուրքից լավ բան պետք չէ սպասել. մենք ինքներս պետք է պահպանենք մեր մշակութային, ազգային արժեքները»,- հավելեց Անթանեսյանը:
Բանախոսների կարծիքով`պատահական չէ նաեւ հայկական «խոհանոց» բառի ստուգաբանությունը, որը նշանակում է վայր, որտեղ մտածում են, խորհում` չնայած նրան, որ հնում այդ բառի համարժեքը եղել է տաճարը:
Բաժանորդագրվեք մեր ալիքին Telegram-ում