ԵՐԵՎԱՆ, 28 ՆՈՅԵՄԲԵՐԻ, ԱՐՄԵՆՊՐԵՍ: «Արհեստակցական միությունների մասին» ՀՀ օրենքը թերի է: Ինչպես «Արմենպրես»-ի հետ զրույցում նշեց Հայաստանի արհմիությունների կոնֆեդերացիայի նախագահ Էդուարդ Թումասյանը, օրենքում կան անհարկի կրկնություններ: «Օրենքում նշված է, որ անգամ երեք մարդ կարող է գրանցվել, ստեղծել արհմիություն ու ծավալել գործունեություն: Այս կետը թերի է այնքանով, որ երեք հոգանոց կառույցն ունի նույն իրավունքները, ինչ 3000 հոգանոցը, այսինքն' բոլորի ձայնը հավասար է դուրս գալիս»,-ասաց Թումասյանը: Նա նշեց, որ օրենքում սահմանափակումներ չկան' բացառությամբ այն հանգամանքի, որ արհմիության անդամ չեն կարող դառնալ զինծառայողները, դատավորները: Թումասյանի խոսքով, «Արհեստակցական միությունների մասին» ՀՀ օրենքի փոփոխության նախագիծը քննարկման փուլում է, որի իրագործման համար կստեղծվի հանձնաժողով:

Ի տարբերություն եվրոպական երկրների նույն օրենքի' կոնֆեդերացիայի նախագահը նշեց մեկ առավելություն: «Մեր արհմիությունները միավորված են մեկ կառույցի' կոնֆեդերացիայի մեջ, իսկ այլ երկրներում այդպես չէ. նրանք ունեն 1-ից ավելի գլխավոր կառույցներ' օրինակ Մոլդովան: Մեկ կառույցի մեջ գտնվելը հնարավորություն է տալիս ավելի միասնական գործելու»,- ասաց Թումասյանը:

«Արհեստակցական միությունների մասին» ՀՀ օրենքն ընդունվել է 2000թ-ին, ուժի մեջ մտել' 2001թ-ի հունվարից: