Կահիրեում ցուցարաները պատրաստվում են երկարաժամկետ բողոքի ակցիաների
ԵՐԵՎԱՆ, 20 ՆՈՅԵՄԲԵՐԻ, ԱՐՄԵՆՊՐԵՍ: Մի քանի հարյուր ցուցարարներ շարունակում են մնալ Եգիպտոսի մայրաքաղաք Կահիրեի Թահրիր հրապարակում, որտեղ ողջ գիշեր շարունակվել են ոստիկանության եւ ցուցարարների միջեւ բախումները: Ինչպես հաղորդում է «Արմենպրես»-ը' վկայակոչելով «Ռոյթեր»-ը, ցուցարարները հրապարակում կրկին սկսել են կառուցել բարիկադներ: Վերջիններիս ուղղությամբ ոստիկանները կիրառում են արցունքաբեր գազ:
Ցուցարարները հայտարարել են, որ չեն հեռանա Թահրիր հրապարակից, քանի դեռ իրականացված հեղափոխությունն իրենց կյանքի բարելավման հարցում դրական ազդեցություն չի ունենում: Ցուցարաները նշում են նաեւ, որ զինված ուժերն այսօր էլ շարունակում են Եգիպտոսի նախկին առաջնորդ Մուբարաքի քաղաքականությունը:
Ողջ գիշեր ցուցարաներն այրել են ավտոմեքենաների անվադողեր, կառուցել քարե պատնեշրներ: Կահիրեի կենտրոնում առաջացել են լուրջ խցանումներ:
Եգիպտոսի առողջապահության նախարարության տեղեկություններով' ցուցարարների եւ ոստիկանության բախման արդյունքում տարբեր աստիճանի մարմնական վնասվածքներ են ստացել 750 մարդ, տուժածներից երկուսը մահացել են:
Բաժանորդագրվեք մեր ալիքին Telegram-ում