Ժամանակը Երևանում՝ 11:07:36,   21 Սեպտեմբեր

Դիպլոմներ՝ ԵՊՀ Իջեւանի մասնաճյուղի հեռակա ուսուցման բաժնի առաջին շրջանավարտներին


ԻՋԵՎԱՆ, 18 ՀՈՒԼԻՍԻ, ԱՐՄԵՆՊՐԵՍ: Այսօր դիպլոմներ հանձնվեցին Երեւանի պետական համալսարանի Իջեւանի մասնաճյուղի հեռակա ուսուցման բաժնի առաջին շրջանավարտներին' իննսունմեկ ուսանողի'»Պատմություն/իրավունքի հիմունքներ», «Մանկավարժություն եւ հոգեբանություն», «Հայոց լեզու եւ գրականություն», «Մաթեմատիկա, ինֆորմատիկա եւ ֆիզիկա» մասնագիտություններից: ԵՊՀԻՄ տնօրինության կողմից դիպլոմների հանձնումը կազմակերպվել էր հանդիսավոր պայմաններում:

Ինչպես «Արմենպրես»-ի Տավուշի մարզի թղթակցին տեղեկացրին ԵՊՀԻՄ հեռակա ուսուցման բաժնից, այս շրջանավարտները ոչ միայն մասնաճյուղի, այլեւ ընդհանրապես մայր բուհի հեռակա ուսուցման բաժնի առաջին շրջանավարտներն են, քանի որ առաջին հեռակա ուսուցման բաժինը բացվել է հենց Իջեւանի մասնաճյուղում:

Դիպլոմների հանձնման հանդիսավոր արարողությանը մասնակցում էին ԵՊՀ ԻՄ տնօրինության եւ դասախոսական անձնակազմը, ուսումնամեթոդական, կադրերի եւ օժանդակ բաժիննների աշխատակիցներ, մասնաճյուղի 4 ֆակուլտետների դեկանները, ինչպես նաեւ շրջանավարտների հարազատներն ու երեխաները:

Հատկանշական է, որ առաջին շրջանավարտներից շատերն այս ուսումնառության շնորհիվ արդեն հաջողության են հասել իրենց աշխատանքային գործունեության ասպարեզում: Նրանց շարքերում կան դպրոցի տնօրեններ, գյուղապետեր, ավագանու անդամներ,մանկավարժներ եւ սպաներ:

ՏԵղեկացնենք, որ կրթօջախը գործում է 1991թ., նախ' որպես քոլեջ, ապա, 1994թ.-ից' ԵՊՀԻՄ: Այսօր մասնաճյուղում սովորում է ավելի քան 2 հազար ուսանող, որից 830-ը' հեռակա ուսուցման բաժնում: Բացի վերոնշյալ չորս մասնագիտություններից, հեռակա ուսուցման բաժնում ուսուցանվում են նաեւ «Բնապահպանություն եւ բնօգտագործում», «Տնտեսագիտություն» մասնագիտությունները:



Լրահոս

Բոլոր նորությունները    




Գործակալության մասին

Հասցե՝ Հայաստան, 0002, Երեւան, Սարյան փող 22, Արմենպրես
Հեռ.՝ +374 10 539818
Էլ-փոստ՝ [email protected]
Яндекс.Метрика
Էջի կարգավորումներ