ԱԺ-ն ընդունեց Արմեն Հարությունյանի հրաժարականը
ԵՐԵՎԱՆ, 10 ՓԵՏՐՎԱՐԻ, ԱՐՄԵՆՊՐԵՍ: Հայաստանի Ազգային Ժողովն այսօր ընդունեց Հայաստանի մարդու իրավունքների պաշտպան Արմեն Հարությունյանի հրաժարականի դիմումը: Ինչպես ԱԺ այսօրվա նիստում նշեց խորհրդարանի նախագահ Հովիկ Աբրահամյանը` հրաժարականի դիմումը հետ վերցնելու համար կանոնակարգով սահմանված երրորդ օրը լրացել է, եւ Արմեն Հարությունյանն իր դիմումը հետ չի վերցրել, ուստի նրա հրաժարականը համարվում է ընդունված:
Ա. Հարությունյանը հրաժարական էր ներկայացրել` Կենտրոնական Ասիայում ՄԱԿ-ի մարդու իրավունքների գլխավոր հանձնակատարի տարածաշրջանային ներկայացուցչի աշխատանքին անցնելու պատճառով: Հայաստանի Սահմանադրությամբ` Մարդու իրավունքների նոր պաշտպանի թեկնածությունը պետք է առաջարկի նախագահ Սերժ Սարգսյանը` խորհրդակցելով ԱԺ-ի հետ:
Թեկնածուն պետք է առաջադրվի պատգամավորների առնվազն 1/5-րդի կողմից: Պաշտպանին 6 տարի ժամկետով ընտրում է Ազգային ժողովը պատգամավորների ընդհանուր թվի ձայների առնվազն 3/5-րդով: Այս պաշտոնում կարող է ընտրվել 25 տարին լրացած, հասարակության մեջ բարձր հեղինակություն վայելող, վերջին 5 տարում Հայաստանի Հանրապետության քաղաքացի հադիսացող եւ մշտապես բնակվող, ընտրական իրավունք ունեցող յուրաքանչյուր ոք:
Բաժանորդագրվեք մեր ալիքին Telegram-ում