Երևանում՝ 11:07,   28 Մայիս 2024

Կայացավ «Երգող Հայաստան» մանկապատանեկան երգչախմբի հանրապետական մրցույթի մարզային փուլը

Կայացավ «Երգող Հայաստան» մանկապատանեկան երգչախմբի հանրապետական 
մրցույթի մարզային փուլը

ԳԱՎԱՌ, 23 ԱՊՐԻԼԻ, ԱՐՄԵՆՊՐԵՍ։ Երևանի երաժշտական ընկերությունը ԿԳՄՍ նախարարության աջակցությամբ 11-րդ անգամ կազմակերպում և Հայաստանի Հանրապետության ողջ տարածքում անցկացնում է «Երգող Հայաստան» մանկապատանեկան երգչախմբերի հանրապետական մրցույթը:

Ինչպես «Արմենպրես»-ը տեղեկացավ Գեղարքունիքի մարզպետի աշխատակազմի ԿՄՍ վարչությունից, 11-րդ հոբելյանական մրցույթը նվիրված էր Հայաստանի երաժշտական ընկերության կազմավորման 65-ամյակին, որի մարզային փուլն անցկացվել է ապրիլի 19-ին Գեղարքունիքի մարզի Գավառ համայնքի Հենրիկ Թալալյանի անվան երաժշտական դպրոցում:

Մրցույթին մասնակցել են  մարզի արվեստի և երաժշտական դպրոցների 7 երգչախմբեր՝ Գավառի Հենրիկ Թալալյանի անվան, Սևանի, Մարտունու, Վարդենիսի թիվ 1 և թիվ 2 երաժշտական, ինչպես նաև Նորատուսի և Սարուխանի արվեստի դպրոցների երգչախմբերը:

Ժյուրիի կազմում էին վաստակաշատ մանկավարժ Արգենտինա Պողոսյանը, «Մշակութային աջակցության հիմնադրամի» մեթոդիստ, Նունե Մելիքսեթյանը, Երևանի Առնո Բաբաջանյանի անվան երաժշտամանկավարժական քոլեջի երգչախմբավարության ամբիոնի վարիչ և Խ.Աբովյանի անվան մանկավարժական համալսարանի ու Կոմիտասի անվան պետական կոնսերվատորիայի դոցենտ, խմբավար Արտաշես Բաբուխանյանը:

Մարզի տարբեր համայնքներից մասնակից խմբերը լավագույնս հանդես են  եկել մրցույթի մարզային փուլում և արժանացել  ժյուրիի գովեստի խոսքերին: Հաղթող են ճանաչվել  և մրցույթի հանրապետական փուլին մասնակցելու հնարավորություն են  ստացել Գավառի Հենրիկ Թալալյանի անվան, Սևանի, Վարդենիսի թիվ 1 երաժշտական և Սարուխանի արվեստի դպրոցների երգչախմբերը:

Վերջում երգչախմբերի ղեկավարների համար ժյուրիի անդամներն անցկացրել են  վարպետաց դասեր, պատասխանել  նրանց հետաքրքրող հարցերին:

«Երգող Հայաստան» մանկապատանեկան երգչախմբերի մրցույթի հանրապետական փուլը տեղի կունենա ապրիլի 28-ին, Երևանում:

Խոսրով Խլղաթյան


Բաժանորդագրվեք մեր ալիքին Telegram-ում






youtube

Բոլոր նորությունները    


Digital-Card---250x295.jpg (26 KB)

12.png (9 KB)

Գործակալության մասին

Հասցե՝ Հայաստան, 0002, Երեւան, Սարյան փող 22, Արմենպրես
Հեռ.՝ +374 11 539818
Էլ-փոստ՝ contact@armenpress.am