ԵՐԵՎԱՆ, 25 ՄԱՅԻՍԻ, ԱՐՄԵՆՊՐԵՍ: Հայաստանի Հանրապետությունում Արգենտինայի արտակարգ և լիազոր դեսպան Մարիանո Վերգարան կարծում է, որ երկու երկրների հարաբերությունները բարձր մակարդակի վրա են: Նրա խոսքով՝ այդ հարաբերությունների զարգացման համար տարիների ընթացքում շատ բան է արվել, սակայն անելիքներ դեռ կան:

Քրիստինե Գրիգորյան, Մարիել Դյուպետի, Վալտեր Րիոս, Նիկա Բաբայան, Մարիանո Վերգարա Վալտեր Րիոս Մարիել Դյուպետի, Վալտեր Րիոս Մարիել Դյուպետի Վալտեր Րիոս, Նիկա Բաբայան, Մարիանո Վերգարա Նիկա Բաբայան, Մարիանո Վերգարա Մարիանո Վերգարա Վալտեր Րիոս, Նիկա Բաբայան Նիկա Բաբայան, Մարիանո Վերգարա Մարիել Դյուպետի

Լուսանկարները` Գևորգ Պերկուպերկյանի

«Արմենպրես»-ի հաղորդմամբ՝ մայիսի 25-ին լրագրողների հետ հանդիպմանը նա շեշտեց՝ այն, որ Հայաստանում Արգենտինայի դեսպանություն կա, պայմանավորված է նաև Արգենտինայի հայկական մեծ համայնքով:

«Դրանով է բացատրվում նաև այն, թե ինչու ենք Հայաստանում Արգենտինայի ազգային տոնի առթիվ, որը նշվում է մայիսի 25-ին, արգենտինացի բանդոնեոնահար Վալտեր Ռիոսի և երգչուհի Մարիել Դյուպետիի մասնակցությամբ համերգ կազմակերպվում, որը կայանալու է մայիսի 27-ին: Դա ևս հայ-արգենտինական ամուր կապերի վառ դրսևորում է»,- ընդգծեց նա:

Դեսպանը խոստովանեց, որ հիացած է Հայաստանով, քանի որ այստեղ մշակույթը բարձր մակարդակի վրա է, և Հայաստանում սիրում ու գնահատում են երաժշտությունը:

«Նկատել ենք, որ երաժշտասեր հայ հասարակայնությունը առանձնահատուկ  վերաբերմունք ունի արգենտինական տանգոյի հանդեպ, հատկապես սիրված են Աստոր Պիացոլայի գործերը: Լավ կլիներ, եթե արգենտինացի մի բանդոնեոնահար գար Հայաստան, մնար այստեղ, համերգներով հանդես գար տարածաշրջանում ու մշտապես արգենտինական երաժշտություն հնչեցներ: Շատ լավ կլիներ, եթե Հայաստանում արգենտինական տանգոյի դպրոց բացվեր և այստեղ տանգոյի պրոֆեսիոնալ պարողներ լինեին»,- շեշտեց Մարիանո Վերգարան:

Նա տեղեկացրեց, որ հոկտեմբերին նախատեսում են ևս մեկ համերգ կազմակերպել Երևանում՝ համագործակցելով Հայաստանի պետական կամերային նվագախմբի հետ: Համերգը նվիրված կլինի Հայաստանի և Արգենտինայի դիվանագիտական հարաբերությունների հաստատման 30-ամյակին:

«Բավականին հագեցած մշակութային ծրագրեր ենք կյանքի կոչելու: Կլինեն լուսանկարչական աշխատանքների ցուցահանդեսներ, գրական գործերի թարգմանությունների շնորհանդեսներ և այլ միջոցառումներ»,- եզրափակեց դեսպանը:

Անժելա Համբարձումյան