Կամերային նվագախումբը համերգ կնվիրի Ցեղասպանության զոհերի հիշատակին
ԵՐԵՎԱՆ, 13 ԱՊՐԻԼԻ, ԱՐՄԵՆՊՐԵՍ: Հայաստանի պետական կամերային նվագախումբը հանդես կգա Հայոց ցեղասպանության անմեղ զոհերի հիշատակին նվիրված համերգով։
«Արմենպրես»-ի հաղորդմամբ՝ Never Forget խորագրով համերգը տեղի կունենա ապրիլի 23-ին, Կոմիտասի անվան կամերային երաժշտության տանը։
Կամերային նվագախումբը (գեղարվեստական ղեկավար և գլխավոր դիրիժոր` Վահան Մարտիրոսյան) ելույթ կունենա դիրիժոր Լյուք Բաղդասարյանի (Շվեյցարիա) ղեկավարությամբ։ Համերգային ծրագրում Յոզեֆ Հայդնի ստեղծագործություններն են։
Ամեն տարի Հայաստանի պետական կամերային նվագախումբը տարբեր նախաձեռնություններով իր հարգանքի տուրքն է մատուցում անմեղ զոհերի հիշատակին։
Յուրաքանչյուր տարի ապրիլի 24-ին` Եղեռնի տարելիցին, Լյուք Բաղդասարյանն իր լարային կազմով ելույթ է ունենում Կոմիտասի ստեղծագործություններով:
Բաժանորդագրվեք մեր ալիքին Telegram-ում