ԵՐԵՎԱՆ, 24 ՀՈՒՆՎԱՐԻ, ԱՐՄԵՆՊՐԵՍ: ՀՀ ոստիկանության Տավուշի բաժին հունվարի 22-ի կեսօրին դիմել է Տավուշի մարզի Արծվաբերդ գյուղի բնակիչ, 57-ամյա մի տղամարդ և հայտնել էր, որ գիշերը հանգուցյալ քենակալի տնից, որն իրեն է վստահված, գողություն են արել:

Ինչպես «Արմենպրես»-ին տեղեկացրին ՀՀ ոստիկանությունից, բաժնի օպերատիվ խումբը քննիչի և փորձագետի հետ մեկնեց Արծվաբերդ: Պարզվել է, որ պատշգամբի պատուհանը կոտրել ու մտել էին տուն, տարել սպասք ու տնտեսական ապրանքներ:

«Ձեռնարկված օպերատիվ-հետախուզական միջոցառումների ու քննչական միջոցառումների արդյունքում ահազանգից 30 րոպե անց կասկածանքով Տավուշի բաժին բերման ենթարկվեց 35-ամյա մի տղամարդ: Նա խոստովանեց, որ գողությունն արել է ինքը:

Հարուցվել է քրեական գործ: Գողոնն առգրավվել է, նշանակվել է ապրանքագիտական փորձաքննություն: Հետագա միջոցառումներով պարզվել է, որ բերման ենթարկվածը, բացի վերը նշվածից, նույն գյուղում երեք անգամ էլ է բնակարանային գողություն արել, մեկ անգամ էլ գողություն է արել նկուղից»,- ասվում է հաղորդագրության մեջ։

Ըստ աղբյուրի՝ տղամարդը ձերբակալվել է։ Դեպքերի հանգամանքները պարզվում են տարածքային քննչական բաժնում կատարվող նախաքննությամբ:

Ենթադրյալ հանցանքի մեջ կասկածվողը կամ մեղադրվողը համարվում է անմեղ, քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով` դատարանի` օրինական ուժի մեջ մտած դատավճռով: