ԳԱՎԱՌ, 21 ՀՈՒՆՎԱՐԻ, ԱՐՄԵՆՊՐԵՍ։  «ԴԻԱԼՈԳ» կազմակերպության նախաձեռնությամբ եւ ՌԴ Օմսկի նահանգապետ Ալեքսանդր Բուրկովի հրավերով Գեղարքունիքի մարզի պատվիրակությունը մարզպետ Կարեն Սարգսյանի գլխավորությամբ 2022 թվականի  հունվարի 20-21-ին պաշտոնական այցով գտնվում է Օմսկի մարզում:

Ինչպես «Արմենպրես»-ը տեղեկացավ ՌԴ Օմսկի մարզի վարչակազմի պաշտոնական կայքից, Օմսկի մարզի եւ Հայաստանի Հանրապետության միջտարածաշրջանային համագործակցության հեռանկարային ուղղությունների եւ առեւտրատնտեսական շփումների ընդլայնման հնարավորությունների մասին հունվարի 20-ին խոսվել է նահանգապետ Ալեքսանդր Բուրկովի եւ մարզպետ Կարեն Սարգսյանի բանակցություններում:

«Եթե խոսենք արտաքին տնտեսական հաջողությունների մասին, ապա Հայաստանը Օմսկի մարզի համար առանցքային արտաքին առեւտրային գործընկերներից է։ Եթե 2021 թվականի ինն ամիսների վիճակագրությունը վերցնենք, մեր փոխադարձ ապրանքաշրջանառությունը գերազանցել է 1,5 միլիոն դոլարը՝ Օմսկի մարզից Հայաստան արտահանման գերակշռությամբ։ Մենք կցանկանայինք մշտական կապեր հաստատել ձեր տարածաշրջանում», - հանդիպման ժամանակ նշել է Ալեքսանդր Բուրկովը։

 Կողմերը քննարկել են պարենային ապրանքների եւ գյուղատնտեսական հումքի փոխադարձ մատակարարումների ընդլայնման հնարավորությունը: Համագործակցության եւս մեկ հեռանկարային ուղղություն է Գեղարքունիքի մարզի ֆերմերների  համար գյուղատնտեսական տեխնիկայի եւ Օմսկի արտադրության բաղադրիչների մատակարարումների կազմակերպումը, Գյուղատնտեսական մեքենաշինության ոլորտում համատեղ կոոպերացիան: Օմսկի մարզ այցի գործնական ծրագրի շրջանակում Հայաստանի պատվիրակությունն այցելել է  Օմսկի փորձարարական գործարան, որն իրականացնում է մեքենաների եւ սարքավորումների արտահանման մատակարարում Կենտրոնական Ասիայի տարածաշրջանի երկրներ, ինչպես նաեւ հանդիպել է Օմսկի ագրարային գիտական կենտրոնի մասնագետների հետ:

Օմսկի մարզի ղեկավարը նշել է  գործարար շրջանակների՝ անցած տարվա ընթացքում Երեւան եւ Գյումրի կատարած առաջին այցի լավ արդյունքը։ «Այս տարի մենք բիզնես առաքելություն ենք ակնկալում Հայաստանից։ Ուրախ կլինենք տեսնել ձեր մարզի ներկայացուցիչներին»,- ասել է  Ալեքսանդր Բուրկովը:

Կարեն Սարգսյանը շնորհակալություն է հայտնել ջերմ ընդունելության համար: «Ես շատ ուրախ եմ, որ իմ առաջին արտասահմանյան այցն այդ պաշտոնում կայացել է հենց Ռուսաստանում ՝ Օմսկի մարզում։ Ես երկար տարիներ ապրել եմ ձեր երկրում: Այստեղ շատ ընկերներ ունեմ եւ շատ եմ ուզում, որ մեր մարզերը բարեկամանան, եւ մենք օգնենք՝ զարգացնել մեր մարզերը»,- նշել է Գեղարքունիքի մարզպետը։

Կողմերը քննարկել են նաեւ կրթության եւ մշակույթի ոլորտներում գործընկերության զարգացումը: Օմսկի պետական համալսարանն արդեն համագործակցության համաձայնագրեր է կնքել Երևանի համալսարանների հետ։ Այսօր Օմսկի հաստատություններում սովորում են 17 հայաստանցի ուսանողներ։ 

«Մեր բուհերի հիման վրա մենք պատրաստ ենք կազմակերպել ինչպես առկա, այնպես էլ հեռակա կրթություն։ Ընդ որում, ոչ միայն երիտասարդների, այլեւ վերապատրաստման կարիք ունեցող մասնագետների համար։ Մեր տարածաշրջանը լավ գիտական ներուժ ունի։ Օմսկի տեխնիկական համալսարանն ընդգրկվել է Ռուսաստանի 50 լավագույն բուհերի շարքում։ Համագործակցության եւս մեկ հեռանկարային ուղղություն կարող է դառնալ բժշկական զբոսաշրջությունը։ Մենք ակտիվորեն զարգացնում ենք այն։ Կա նաև ընդհանուր զբոսաշրջության ներուժ։ Բացի այդ, ուրախ կլինենք Օմսկում տեսնել հայ մարզիկներին. ամեն տարի տարածաշրջանում անցկացվում են 400 -ից ավելի մրցումներ, այդ թվում ՝ սիբիրյան միջազգային մարաթոն, որի համար մեզ մոտ են գալիս վազորդներ ամբողջ աշխարհից»,- հրավիրել է Ալեքսանդր Բուրկովը։

Այցի ընթացքում նախատեսվում է Գեղարքունիքի մարզպետ Կարեն Սարգսյանի հանդիպումը Օմսկի հայկական համայնքի հետ։ Պաշտոնական տվյալներով՝ Օմսկի մարզում բնակվում է մոտ 40 հազար հայ։

Խոսրով Խլղաթյան