ԳԱՎԱՌ, 2 ԴԵԿՏԵՄԲԵՐԻ, ԱՐՄԵՆՊՐԵՍ։ Սեւանցի ծանրորդուհի Ալինա Սուքիասյանը հերթական հաղթական արդյունքն է գրանցել՝ առաջին տեղը գրավելով Երեւանում տեղի ունեցած ծանրամարտի բաց առաջնությունում։

Ինչպես «Արմենպրես»-ին տեղեկացրին Սեւանի համայնքապետարանի աշխատակազմից,  մարզիչ Գառնիկ Աբրահամյանի սանը  պոկում վարժությունում բարձրացնելով նախ 65, ապա 70 եւ 73-կիլոգրամանոց ծանրաձողը՝ հավասարը չի ունեցել իր քաշային կարգում։ Հրում վարժությունում Ալինան բարձրացրել է 80 եւ 85-կիլոգրամանոց ծանրաձողը։ Այս անգամ նրա համար անհաղթահարելի է մնացել 88 կիլոգրամը, սակայն դա չի խանգարել  նրան՝ գրավել առաջին տեղը նաեւ հրում վարժությունում։
Երկամարտի 158 կգ արդյունքով Ալինա Սուքիասյանը դարձել է առաջնության հաղթող։
«Ալինա Սուքիասյանը սովորում է Սեւանի թիվ 6 միջնակարգ դպրոցում, ընդամենը երկու տարի է, ինչ ծանրամարտը դարձրել է իր ամենօրյա զբաղմունքը, եւ գրանցած հաջողություններն էլ այս մարզաձեւում նրա համար բացելու են առավել խոստումնալից ճանապարհներ:
Մեր մարզուհին արդեն ընդգրկվել է Հայաստանի հավաքականի կազմում»,-ներկայացրին Սեւանի համայնքապետարանի աշխատակազմից։

Խոսրով Խլղաթյան