ԳՅՈՒՄՐԻ, 2 ՆՈՅԵՄԲԵՐԻ, ԱՐՄԵՆՊՐԵՍ: Վերանորոգվել է Շիրակ և Կամո գյուղերի միջև ընկած շուրջ 5 կմ երկարությամբ ճանապարհահատվածը։ Ինչպես տեղեկացնում է «Արմենպրես»-ը` ճանապարհային ցանցի բարելավման ծրագրի շրջանակում նորոգված ճանապարհահատվածը համապատասխանում է բոլոր արդիական պահանջներին. վերականգնվել են կամուրջները, մայթերը, կառուցվել է ջրահեռացման համակարգը։

«Կառավարության մոտեցումն ու ձեռագիրը գյուղական համայնքների զարգացումն ապահովելն է, իսկ դա հնարավոր կլինի ենթակառուցվածքների զարգացմամբ։  Շիրակ և Կամո գյուղերի միջև ընկած ճանապարհահատվածում աշխատանքներն իրականացվել են բարեխղճորեն: Սա կարևոր նախադրյալ է համայնքների համաչափ զարգացման համար»,- լրագրողների հետ զրույցում նշեց Շիրակի մարզպետ Նազելի Բաղդասարյանը։

Պետություն-համայնք համագործակցության արդյունքում, սուբվենցիոն ծրագրի շրջանակներում հիմնանորոգվել է նաև Կամոյի մանկապարտեզը։ 49,8 մլն դրամի շրջանակում «Շինարար» ՍՊԸ-ն իրականացրել է հիմնանորոգման, ներքին հարդարման աշխատանքներ։ Կամոյի մանկապարտեզն այժմ ունի 21 սան, շենքը նախատեսված է 55 երեխայի համար։

 Արմենուհի Մխոյան