Մեկնարկել է Արամ Խաչատրյանի անվան 18-րդ միջազգային մրցույթի հայտերի ընդունման գործընթացը
ԵՐԵՎԱՆ, 18 ՆՈՅԵՄԲԵՐԻ, ԱՐՄԵՆՊՐԵՍ: Արամ Խաչատրյանի անվան 18-րդ միջազգային մրցույթը կանցկացվի թավջութակ մասնագիտությամբ։ «Արմենպրես»-ի հաղորդմամբ՝ հայտերի ընդունման գործընթացն արդեն մեկնարկել է։ Հայտադիմումների ներկայացման վերջնաժամկետը 2022 թվականի մայիսի 10-ն է։
«Արամ Խաչատրյան-մրցույթ» մշակութային հիմնադրամից հայտնում են, որ մրցույթին կարող են մասնակցել 16-35 տարեկան թավջութակահարներ։
Մրցույթի մանրամասներին և դիմելու կարգին կարելի է ծանոթանալ հետևյալ հղմամբ։
Ամեն տարի Ա. Խաչատրյանի անվան մրցույթը մեկնարկում է հայ մեծ կոմպոզիտորի ծննդյան օրը՝ հունիսի 6-ին։ Երաժշտական ստուգատեսն անցկացվում է երեք փուլով։ Երկրորդ և երրորդ փուլերում մասնակիցների կողմից պարտադիր կատարման ծրագրերում ներառված են Ա. Խաչատրյանի ստեղծագործությունները։ Ինքը՝ Խաչատրյանը, նույնպես կրթությամբ թավջութակահար էր և այս գործիքի համար գրել է մի քանի ստեղծագործություն։
Խաչատրյանական մրցույթի նպատակն է բացահայտել տաղանդաշատ երիտասարդների, աշխարհում հանրայնացնել Արամ Խաչատրյանի արվեստը։
Ա. Խաչատրյանի անվան միջազգայինը համաշխարհային երաժշտական աշխարհում ճանաչում ունեցող մրցույթներից է։ Կազմակերպիչն է «Արամ Խաչատրյան-մրցույթ» մշակութային հիմնադրամը։
Բաժանորդագրվեք մեր ալիքին Telegram-ում