ԵՐԵՎԱՆ, 4 ՆՈՅԵՄԲԵՐԻ, ԱՐՄԵՆՊՐԵՍ: Ոստիկանության Արմավիրի բաժնի ծառայողների պրոֆեսիոնալ աշխատանքի շնորհիվ նոյեմբերի 3-ին առգրավվել է ապօրինի պահվող ինքնաձիգ։ «Արմենպրես»-ին այս մասին տեղեկացրին ՀՀ ոստիկանությունից։

«Քրեական հետախույզները տեղեկություններ էին ստացել, որ Արմավիր քաղաքի Լերմոնտովո փողոցի 57-ամյա մի բնակիչ ապօրինի զենք-զինամթերք ունի։ Տեղեկությունների իսկությունը ստուգելուց հետո ոստիկանները նշված հասցե մեկնեցին։ Տնից հայտնաբերվեց «ԱԿՄ» տիպի ինքնաձիգ` դատարկ փամփշտատուփով:
Ըստ 57-ամյա տղամարդու` ինքնաձիգը ձեռք էր բերել 44-օրյա պատերազմի ժամանակ:
Հայտնաբերվածն առգրավվել է»- ասվում է հաղորդագրության մեջ։

Աղբյուրը հայտնում է, որ նշանակվել է դատաձգաբանական փորձաքննություն:
Փաստի առթիվ նախապատրաստվում են նյութեր:

Ենթադրյալ հանցանքի մեջ կասկածվողը կամ մեղադրվողը համարվում է անմեղ, քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով` դատարանի` օրինական ուժի մեջ մտած դատավճռով: