Աթլետիկան ընդգրկվել է Եվրոպական խաղերի ծրագրում
ԵՐԵՎԱՆ, 29 ՀՈԿՏԵՄԲԵՐԻ, ԱՐՄԵՆՊՐԵՍ: Եվրոպայի օլիմպիական կոմիտեն (ԵՕԿ) հայտնել է աթլետիկա մարզաձևը Եվրոպական երրորդ խաղերի ծրագրում ընդգրկելու մասին:
«Արմենպրես»-ի հաղորդմամբ` այս մասին հայտնում է ՀԱՕԿ-ը: Մրցաշարը կանցկացվի մայրցամաքի թիմային առաջնության ձևաչափով։
Համապատասխան պայմանագիրը ստորագրվել է ԵՕԿ-ի և աթլետիկայի եվրոպական ֆեդերացիայի (EA) միջև։ Բոլոր երկրները, անկախ նրանից, թե որ դիվիզիոնում են հանդես գալիս, կմասնակցեն խաղերին։ Մրցավայր է ընտրված «Շլյոնսկի» ստադիոնը, որը գտնվում է Լեհաստանի Խուժուվ և Կատովիցե քաղաքների միջև:
Կողմերը երկար են քննարկել թիմային առաջնությունը ստուգատեսի ծրագրում ինտեգրելու հնարավորությունը:
Հիշեցնենք, որ աթլետիկան ներառված էր Եվրոպական նախորդ երկու խաղերի ծրագրում։ Մինսկի խաղերում կազմակերպիչները փորձարկել են թիմային նոր ձևաչափ, որը կրում է «Դինամիկ աթլետիկա» անվանումը։
Ծրագրում ընդգրկված որոշ մարզաձևերում մասնակիցները ձեռք կբերեն Փարիզ -2024 -ի օլիմպիական ուղեգրեր:
Կազմկոմիտեն և համակարգող հանձնաժողովը շարունակում են բանակցել միջազգային համապատասխան ֆեդերացիաների հետ՝ ծրագիրը համալրելու նպատակով:
Եվրոպական մարզական ամառային երրորդ խաղերը տեղի կունենան Լեհաստանում ՝ 2023թ. հունիսի 9 – 25 –ը:
Բաժանորդագրվեք մեր ալիքին Telegram-ում