Համալսարանական բժիշկ-նյարդաբան Բելլա Գրիգորյանը ֆրանսիացի գործընկերների հետ աշխատաժողով է վարել
ԵՐԵՎԱՆ, 15 ՀՈԿՏԵՄԲԵՐԻ, ԱՐՄԵՆՊՐԵՍ: ԵՊԲՀ «Հերացի» թիվ 1 հիվանդանոցային համալիրում Հայ-ֆրանսիական առաջին գիտաբժշկական համաժողովի շրջանակում, երկու երկրի մասնագետները «Նյարդային վնասվածքների էլեկտրանեյրոմիոգրաֆիկ (ENMG) գնահատումը» թեմայով աշխատաժողովի շրջանակում անցկացրին ինտերակտիվ հանդիպում:
Համալսարանական հիվանդանոցի Ռադիոլոգիայի կենտրոնի էլեկտրանեյրոմիոգրաֆիայի բժիշկ, նյարդաբան Բելլա Գրիգորյանն արտերկրի գործընկերների, բժշկական համալսարանի կլինիկական օրդինատորների մասնակցությամբ իրականացրեց հետազոտություններ, ներկայացրեց իր կողմից իրականացված բազմաթիվ նյարդային վնասվածքներ ունեցող վիրավոր զինվորների հետազոտման ուսումնասիրությունները:
Բժիշկ-նյարդաբանը դասախոսել է նաև պերիֆերիկ նյարդերի էլեկտրանեյրոմիոգրաֆիկ հետազոտությունների վերաբերյալ: Աշխատաժողովի ընթացքում հետազոտվեց երեք պացիենտ:
Հանդիպման ընթացքում համալսարանական մասնագետն անդրադարձավ նաև զգայական նյարդի հաղորդունակության ուսումնասիրություններին: Աշխատաժողովի ընթացքում բժիշկները փորձի փոխանակման լայն հնարավորություն ունեցան. Ֆրանսիայից ժամանած գործընկերները կիսվեցին «անսովոր» (Unusual sensory nerve) զգայական նյարդային ուսումնասիրությունների թեմայով:
Հոկտեմների 14-ին ԵՊԲՀ-ում մեկնարկել է եռօրյա Հայ-ֆրանսիական գիտաբժշկական առաջին համաժողովը «Բուժօգնության ապահովումը Լեռնային Ղարաբաղի հակամարտության վիրավորներին» խորագրով:
Համաժողովի ընթացքում ֆրանսիացի և հայ մասնագետները նախանշեցին Ֆրանսիայի և Հայաստանի միջև բժշկության ոլորտում տևական համագործակցության հեռանկարները:
Բաժանորդագրվեք մեր ալիքին Telegram-ում