Կանանց շախմատի ընտրանու առաջին մրցակիցն ԱԱ-ում հայտնի է
ԵՐԵՎԱՆ, 27 ՍԵՊՏԵՄԲԵՐԻ, ԱՐՄԵՆՊՐԵՍ: Հայաստանի կանանց շախմատի թիմի մրցակիցն աշխարհի առաջնության անդրանիկ տուրում Ֆրանսիան է:
«Արմենպրես»-ի հաղորդմամբ` Իսպանիայի Սիտժե քաղաքում մեկնարկող մրցաշարի առաջին տուրում Զավեն Անդրիասյանի գլխավորած թիմը կմրցի ֆրանսիացի շախմատիստուհիների դեմ: Առաջին տուրը կմեկնարկի Երևանի ժամանակով ժամը 17:00-ին: Մյուս զույգերն են. Ռուսաստան-Իսպանիա, Ադրբեջան-Հնդկաստան:
Հայաստանի հավաքականում ընդգրկված են Էլինա Դանիելյանը, Լիլիթ Մկրտչյանը, Աննա Սարգսյանը, Սուսաննա Գաբոյանը և Սիրանուշ Ղուկասյանը: Աշխարհի առաջնությունը կանցկացվի Իսպանիայի Սիտժե քաղաքում: Այն կմեկնարկի սեպտեմբերի 27-ին և կեզրափակվի հոկտեմբերի 3-ին: Մասնակիցները մրցելու են նոկաուտ համակարգով, և խմբի հաղթողը փորձելու է պայքարել մեդալների համար:
Բաժանորդագրվեք մեր ալիքին Telegram-ում