Ժամանակը Երևանում՝ 11:07:36,   23 Հոկտեմբեր

ՌԴ-ն և ՀՀ-ն կարող են համատեղ լուծել տնտեսությանը և համավարակին վերաբերող հարցերը․ Օվերչուկ

ՌԴ-ն և ՀՀ-ն կարող են համատեղ լուծել տնտեսությանը և համավարակին վերաբերող 
հարցերը․ Օվերչուկ

ԵՐԵՎԱՆ, 20 ՍԵՊՏԵՄԲԵՐԻ, ԱՐՄԵՆՊՐԵՍ։ Ռուսաստանը պատրաստ է օգնել Հայաստանին համատեղ ջանքերով հաղթահարել տնտեսական ճգնաժամը և պանդեմիան։

«Արմենպրես»-ի հաղորդմամբ՝ այս մասին Երևանում Armenia Business Forum-ի շրջանակում «Հայ-ռուսական տնտեսական համագործակցություն. Հեռանկարային նախագծեր» խորագրով քննարկման ժամանակ ասաց ՌԴ փոխվարչապետ Ալեքսեյ Օվերչուկը։

 «ՌԴ և ՀՀ տնտեսական համագործակցությունը բավականին խոր արմատներ ունի։ Համատեղ ջանքերով կարող ենք միմյանց օգնել գտնել այնպիսի գլոբալ մարտահրավերների պատասխաններն, ինչպիսիք են տնտեսական ճգնաժամը, համավարակը։ Միասին մենք կարող ենք հասնել լավագույն արդյունքների և անգամ գերազանցել դրանք։ Այս տարվա ընթացքում արդեն իսկ նկատում ենք դրական արդյունքներ համատեղ առևտրի շրջանակներում՝ 17 տոկոսից մի փոքր ավելին»,- նշեց Օվերչուկը։

Նրա խոսքով, սակայն, ապրանքաշրջանառության ներկայիս արդյունքները չեն կարող գոհացնել ռազմավարական գործընկերներին, քանի որ հնարավոր է ավելի լավ, և պետք է անել ավելի լավ։

«Մենք լուրջ ներուժ ունենք, որպեսզի համատեղ առևտրի, ներդրումների ոլորտներում աճ գրանցենք, իսկ ամենակարևորը՝ մենք ունենք համագործակցության արդյունավետ գործիքներ։ ՌԴ և ՀՀ ձեռնարկատերերը պետության կողմից աջակցություն են ստանում, հնարավորություն կա ռուսական ինստիտուտների գործիքակազմն օգտագործելու։ Այս ամենը նպաստում է նրանց բիզնեսների զարգացմանը»,- ասաց ՌԴ փոխվարչապետը։

Նա հույս հայտնեց, որ բիզնես ֆորումի շրջանակում Հայաստանն իր համար նորովի կբացահայտի Ռուսաստանը։ Օվերչուկի պնդմամբ՝ ՌԴ-ն կարող է արդյունավետ լուծումներ առաջարկել տրանսպորտային, էներգետիկ և սոցիալական ենթակառուցվածքների համար։

«Մենք կանխատեսում ենք, որ այսօրվա միջոցառման արդյունքներով, կլինեն նոր համատեղ նախագծեր, որոնք թույլ կտան լուրջ քայլ անել երկկողմ հարաբերություններում»,- ընդգծեց Օվերչուկը և կոչ արեց երկու երկրների գործարար շրջանակներին ուսումնասիրել բացվող բոլոր հնարավորությունները՝ բոլոր ոլորտներում։

 








youtube

Բոլոր նորությունները    


Գործակալության մասին

Հասցե՝ Հայաստան, 0002, Երեւան, Սարյան փող 22, Արմենպրես
Հեռ.՝ +374 11 539818
Էլ-փոստ՝ [email protected]