Բացվեց ռուսական երրորդ կենտրոնը. աշխարհագրությունն ընդլայնվում է
ԵՐԵՎԱՆ, 7 ՀՈՒԼԻՍԻ, ԱՐՄԵՆՊՐԵՍ: Հայ-ռուսական դարավոր բարեկամական կապերն ամրապնդելու, Հայաստանում ռուսաց լեզվի, մշակույթի նկատմամբ հետաքրքրությունը մեծացնելու առաքելությամբ «Մոսկվայի տուն» մշակութագործարարական կենտրոնի նախաձեռնությամբ Արմավիրի մշակույթի տանը բացվեց «Ռուսական կենտրոնը»: Կենտրոնը գրականության, արվեստի մասին քննարկումների, կինոդիտումների միջոցով կհամախմբի երիտասարդությանը և նրանց համար կրթական ժամանց կապահովի:
«Արմենպրես»-ի հաղորդմամբ՝ կենտրոնի բացման հանդիսավոր արարողությունը, որին ներկա էին մի խումբ պետական այրեր, տեղի ունեցավ հուլիսի 7-ին: Հյուրերին աղ ու հացով, երգ ու պարով դիմավորեցին «Արմավիր» պարային համույթի սաները:
«Կարծում եմ՝ նման կենտրոնների հիմնական նպատակը մեր ժողովուրդների միջև կապերի ամրապնդումն է: Իհարկե, այդ կապերը խորը և հարուստ արմատներ, պատմություն ունեն, և մեզ շատ բան է միավորում թե՛ պետական, թե՛ միջանձնային հարաբերություններում, բայց շատ կարևոր է, որ Հայաստանի մարզերում, քաղաքներում լինեն վայրեր, որտեղ կարող են այցելել երիտասարդներն ու ծանոթանալ այսօրվա Ռուսաստանին, երկրի մշակույթին, պատմությանը: Նշանակալի գործոններից է նաև ռուսաց լեզվի ուսուցման համար պայմանների ստեղծումը»,- նշեց ՀՀ-ում ՌԴ դեսպան Սերգեյ Կոպիրկինը:
ՀՀ ԿԳՄՍ նախարարի տեղակալ Արա Խզմալյանը շնորհավորեց բոլորին կենտրոնի բացման առթիվ և հիշեցրեց, որ ռուսաստանյան կենտրոններ կան Երևանում, Վանաձորում:
«Ռուսաց լեզվի իմացությունը, որը կենտրոնի հիմնական կարևոր գործառույթներից է, ոչ միայն հաղորդակցման միջոց է, այլև ինքնակատարելագործման ճանապարհ, ճանապարհ դեպի բարձրագույն պոեզիա, գրականություն, մշակույթ, և ես շատ ուրախ եմ, որ դեպի այդ մշակույթը տանող նոր հնարավորություններ ենք ստեղծում»,- եզրափակեց Խզմալյանը:
Արմավիրի մարզպետ Համբարձում Մաթևոսյանը նշեց, որ սա իր գործընկերների առաջին այցը չէ Արմավիր: Մեկ տարին դեռ չի բոլորել, որ «Մոսկվայի տուն» կենտրոնի հետ համագործակցության մի քանի հուշագիր են ստորագրել: «Մարզի երկու քաղաքներում ունենք կրթական, սոցիալական, մշակութային ծրագրեր, որոնք իրականացնում ենք գործընկերների օգնությամբ, դպրոցներում ևս միջոցառումներ ենք կազմակերպում: Ողջունում եմ նաև այս նախաձեռնությունը»,- շեշտեց մարզպետը:
«Մոսկվայի տուն» մշակութագործարարական կենտրոնի գլխավոր տնօրեն Վահրամ Կարապետյանի խոսքով՝ առաջին ռուսական կենտրոնը բացել են Երևանում՝ Ավ. Իսահակյանի անվան կենտրոնական գրադարանում: «Ռուսական կենտրոնը նախ և առաջ ենթադրում է ռուսաց լեզվի անվճար ուսուցում, Ռուսաստանի պատմության, մշակույթի ուսումնասիրում: Այստեղ տարբեր միջոցառումներ են անցկացվելու, քննարկումներ: Այսօր Հայաստանում երեք ռուսաստանյան կենտրոն ունենք, 15 քաղաքում ռուսաց լեզվի անվճար դասընթացներ են գործում, որոնց մասնակցում է 250 երեխա, և այս գործընթացը շարունակական է լինելու, իսկ աշխարհագրությունն ընդլայնվելու է»,- տեղեկացրեց Կարապետյանը:
Նա շնորհակալություն հայտնեց բոլոր աջակիցներին, որոնց շնորհիվ կենտրոնի բացումն իրականություն է դարձել, և հավելեց, որ այս հարթակը օգնություն է այն երեխաներին, որոնք ցանկանում են ռուսերեն սովորել: Դասերի մասնակիցները ռուսաց լեզուն յուրացնում են ոչ թե դպրոցական ծրագրով, այլ խաղերի, դիդակտիկ և այլ մեթոդների կիրառմամբ:
Կենտրոնում ներկայացված է կրթական նյութերի մեծ բազմազանություն, որոնց միջոցով հնարավոր է ճշգրիտ և ամենատարբեր ոլորտներում բաց տեղեկատվություն ստանալ Ռուսաստանի մասին: Կենտրոնը կահավորված և հագեցած է ժամանակակից տեխնիկայով, որը հնարավորություն է տալիս կազմակերպել ինտերակտիվ դասեր և քննարկումներ:
Միջոցառման շրջանակում ռուսերենի անվճար դասընթացի նախորդ շրջափուլի մասնակիցներն ստացան երկամսյա կուրսերն ավարտելու սերտիֆիկատներ: Նրանք հանդես եկան բաց դասով, որին մասնակցեցին բոլոր հյուրերը:
Անժելա Համբարձումյան
Բաժանորդագրվեք մեր ալիքին Telegram-ում